Вынікі 2020 года ад канала Белліт
t.me/bellitra
Традыцыйна падводжу вынікі папярэдняга года, і спачатку некалькі лічбаў. За 2020 год я прачытала 185 кніг, з іх 47 былі па-беларуску, прычым 37 кніг — ад беларускіх аўтараў.
Сярод выдавецтваў у мяне ў лідарах "Янушкевіч", я прачытала 13 іх кніг, другое месца з 6 кнігамі дзеляць "Галіяфы" і "Мастацкая літаратура".
У планах на 2021 — чытаць больш класікі, перачытваць даўно чытаную класіку, запісаць больш выпускаў падкаста з цыкла “Асобы”. Таксама спадзяюся, што гэты год нам падорыць мноства цудоўных твораў беларускіх аўтараў.
ТОП-10 беларускіх кніг, прачытаных мной у 2020 годзе:
Альгерд Бахарэвіч “Апошняя кніга пана А.” (Янушкевіч, 2020)
Новы раман аднаго з найлепшых сучасных беларускіх празаікаў і першы беларускі твор, у якім сустракаецца слова "каранавірус".
Кніга казак, за якімі хаваецца глыбокі змест.
Найлепшая кніга года паводле экспертаў Радыё Свабода (я таксама прымала ўдзел ў галасаванцы: https://svabod1.azureedge.net/a/31011279.html ).
https://januskevic.by/catalog/proza/4181/
Андрэй Федарэнка “Жэтон на метро” (Мастацкая літаратура, 2020)
Доўгачаканы новы раман прызнанага майстра беларускай літаратуры. Нечаканы ад аўтара дэтэктыўны трылер, дынамічная крымінальная гісторыя.
https://magazin.belkniga.by/catalog/belorusskaya_sots_znachimaya_lite/zheton-na-metro-raman/
Вольга Гапеева “Кэмэл-Трэвэл” (Галіяфы, 2019)
Псіхатэрапеўтычна-аўтабіяграфічны раман пра жыццё дзяўчынкі ў 80-90-я гады.
http://halijafy.by/krama/volga-gapeeva-kemel-trevel/
Валеры Гапееў “І хай ніхто не пойдзе пакрыўджаным, або Грак і Монця Хрысцік” (Электронная кнігарня, 2020)
Кніга, у якой няма схаваных сэнсаў, усе высновы навідавоку, і яны вельмі простыя. Дабро перамагае зло, але ж спачатку герой стаіць перад біблейным выбарам: ці падстаўляць левую шчаку, калі цябе ўдарылі па правай?
На жаль, цалкам кніга выйшла толькі ў электронным фармаце, ці можна пачытаць папяровую ў часопісе "Дзеяслоў".
https://kniharnia.by/catalog/suchasnaya_proza/moncia_chryscik/
Міхал Бараноўскі “Volumen.2” (Медысонт, 2020)
Другі зборнік Бараноўскага — як лагічны працяг першага. Афармленнем, якасцю вершаў. Сёлета гэты зборнік стаў найлепшай паэтычнай кнігай года паводле экспертаў Радыё Свабода.
І адзіны зборнік паэзіі ў маім топ-10 за гэты год.
https://knihi.by/be/baranouski-michal-volumen-2
Сяргей Дубавец “Тантамарэскі” (Радыё Свабодная Эўропа / Радыё Свабода, 2019 г.).
Сёлетні лаўрэат Прэміі Гедройца, які напісаў цікавую дакументальную кнігу пра справу аршанскіх мытнікаў. Спадабаецца аматарам рамана Франца Кафкі "Працэс".
https://knihi.com/Siarhiej_Dubaviec/Tantamareski.html#1
Сяргей Абламейка “Каліноўскі і палітычнае нараджэньне Беларусі” (Радыё Свабодная Эўропа / Радыё Свабода, 2020 г.).
Зборнік эсэ пра адну з найбольш яркіх постацяў у беларускай гісторыі і найлепшая дакументальная кніга 2020 года паводле экспертаў Радыё Свабода.
https://docs.rferl.org/be-BY/2020/03/31/fb38e547-bad2-419d-87f3-81e9d546b7c5.pdf
Сяргей Балахонаў “Бог кахання Марс” (Янушкевіч, 2020)
Гісторыя кахання на фоне гомельскіх і марсіянскіх краявідаў.
https://januskevic.by/catalog/proza/4180/
Зараслава Камінская “Калядны стол. Некулінарная кніга” (Галіяфы, 2019)
Цёплы зборнік аўтабіяграфічных гісторый пра ежу.
Сёлетняя пераможца Прэміі Цёткі за найлепшую кнігу для дзяцей і падлеткаў.
http://halijafy.by/krama/zaraslava-kaminskaya-kalyadny-stol-nekulinarnaya-kniga/
Артур Клінаў “Локісаў” (Логвінаў, 2020)
Праз 7 гадоў пасля выхаду апошняй мастацкай кнігі мастак Артур Клінаў выдае даволі актуальны раман пра жыццё ў беларускай правінцыі, якую не варта недаацэньваць.