USMLE STEP 2 CK – 254 | Khojiakbar

Assalomu alaykum!

Mening ismim Xojiakbar. Men Toshkent Davlat Tibbiyot Universiteti (eski ToshMI kampusi) bitiruvchisiman. 2026-yil 16-iyun kuni Anqarada USMLE Step 2 CK imtihonini yangi bloklar formatida topshirdim. Ushbu hisobotni tayyorgarlik jarayonida kimgadir oz bo‘lsa ham foydasi tegadi degan umidda yozmoqdaman.

Step 2 tayyorgarligini Step 1 topshirganimdan taxminan bir oy o‘tib boshladim. Ko‘pchilik bunday uzoq tanaffus qilishni tavsiya etmaydi, ammo o‘sha paytda juda charchagan edim.

Umumiy tayyorgarlik muddati - 2 yil 2 oy.

Tayyorgarlikni shartli ravishda 4 bosqichga bo‘lish mumkin:

1. UWorld
2. Amboss
3. CMS
4. NBME + Amboss High Yield

Birinchi ikki bosqich davomida tayyorgarlikni universitetdagi o‘qish va tibbiyotga aloqador bo‘lmagan ish bilan birga olib bordim. Shu sababli jarayon ancha cho‘zilib ketdi.

1-bosqich: UWorld (+ incorrects)

Davomiyligi - 1,5 yil

UWorld - juda sifatli question bank. Men uning interfeysi va materiallarni taqdim etish uslubini juda yaxshi ko‘raman. Savollarni tizimlar bo‘yicha yechardim.

Avvaliga kuniga 10 ta case ishlardim, keyinchalik esa juda sekinlik bilan yuklamani oshirib, bosqich oxiriga kelib kuniga 40 tagacha yetkazdim. Step 2 darajasi boshidanoq o‘zini ko‘rsatdi. Birinchi o‘tish davomida o‘zimni juda sust his qilardim.

Buning sababi Step 1 bazasi unchalik kuchli bo‘lmaganimi, universitet darslari va haftasiga 40 soatdan ortiq ishlash ta'sir qilganimi - bilmayman. Lekin na savollarni yaxshi ishlay olardim, na ularni to‘liq tahlil qila olardim. Go‘yoki butun question bankni ko‘r-ko‘rona yechayotgandek edim. Bu hissiyot hatto bankning yarmidan ko‘prog‘ini tugatganimdan keyin ham yo‘qolmadi.

Kayfiyat ham tez-tez o‘zgarib turardi. Ba'zi kunlari hammasi juda yaxshi ketardi. Boshqa kunlari esa o‘zimni mutlaqo hech narsaga yaramaydigan odamdek his qilardim. Shunday paytlarda qo‘limdan keladigan yagona narsa yotib olib, o‘zimni qattiq ayblash edi. Step 2 CK Notes o‘qib ko‘rdim - yoqmadi. Inner Circle o‘qishni boshladim - tashlab yubordim. Janki(ng) sinab ko‘rdim - bu usul menga mos emasligini tushundim. Shunday qilib, taxminan 16 oy ichida UWorldning birinchi aylanasini o‘z Anki kartalarim bilan birga tugatdim.

Question bank oxiriga kelib ham bilimlarim yetarli darajada shakllanganini his qilmadim. Aslida shu vaqtga kelib o‘zimni ancha ishonchli his qilishim kerak edi, ammo bunday bo‘lmadi. Shundan keyin incorrect savollarni ishlashni boshladim. Ikki oy ichida ularning taxminan 70 foizini tugatdim. Natijada UWorld umumiy ko‘rsatkichi 56% gacha tushdi. Keyin esa UWSA 3 ni oddiy practice test sifatida ishladim.

Hozir qayta boshlash imkonim bo‘lganida nima qilgan bo‘lardim?

-O‘z imkoniyatlarimni ortiqcha baholamas edim. Avvalo moliyaviy ahvolimni yaxshilab, to‘liq stavkada emas, yarim stavkada ishlaydigan ish topgan bo‘lardim. Shunda o‘qishdan oldin bunchalik charchab qolmasdim. Tayyorgarlik qancha uzoq davom etsa, hissiy holatim ham shuncha yomonlashib bordi. Afsuski, biz Jeyson Stetxem emasmiz. Oxir-oqibat fiziologiya baribir o‘z ta'sirini ko‘rsatadi.

2-bosqich: AMBOSS

Davomiyligi - 4 oy.

Amboss menga ko‘plab mavzularni yangi nuqtai nazardan ko‘rishga yordam berdi. Aynan Amboss ishlayotgan vaqtimda o‘zimdagi rivojlanishni eng yaqqol his qilganman. Balki shu sababli ham ko‘pchilik Ambossni juda yaxshi ko‘radi. Yoki buning sababi shundaki, ko‘pchilik singari men ham UWorld orqali yaxshi baza yig‘ib bo‘lgach Ambossga o‘tganman. Shu bois ko‘plab mavzular allaqachon tanish tuyulgan. Avval faqat 1-4 bolg‘achali (hammer) savollarni ishladim. Shundan keyin NBME 9 ni yechdim. Natija - 69,5% = 232. Konvertatsiya qilish uchun nbcalc.netlify.app saytidan foydalandim. Keyin esa 5 bolg‘achali savollarni ham tugatdim. Bundan tashqari boshqa hech qanday qo‘shimcha resurs o‘qimadim va ishlatmadim.

Agar qaytadan boshlaganimda nima qilgan bo‘lardim?

-Anki kartalarim uchun aniq kunlik reja tuzardim va unga qat'iy amal qilardim. Masalan, kuniga kamida 100 ta kartani takrorlash yetarli bo‘lardi. Ambossni imkon qadar tezroq tugatishga juda ko‘p e'tibor berganim sababli Anki kartalarini vaqtida takrorlay olmadim. Ba'zida esa shunchaki erinardim. Natijada kartalar yig‘ilib borardi. Ular bilan birga jahlim ham yig‘ilib borardi. Bir necha marta sabrim tugab, barcha kartalarni birdaniga "Done" holatiga o‘tkazib yuborganman. Ertasi kuni esa go‘yoki hammasi tugagandek yana "toza oyna" bilan boshlardim. 😉

-NBME 9 ni 5 bolg‘achali savollarni tugatgandan keyin ishlagan bo‘lardim. Nega o‘sha paytda buning teskarisini qilganimni hozir ham eslay olmayman.

3-bosqich: CMS

Davomiyligi - 1 oy.

Aynan shu bosqichdan boshlab ishimdan uzoq muddatli ta'til olishga muvaffaq bo‘ldim. Shundan keyin tayyorgarlik ancha tezlashdi. Juda eski formalarni hisobga olmaganda, deyarli barcha CMS formalarini ishladim. Ular menga juda yoqdi. Ko‘pincha savollar qisqa bo‘ladi. Har doim sizdan aynan nimani so‘rayotgani aniq bo‘ladi. CMS bilimdagi bo‘shliqlarni topish uchun juda yaxshi resurs hisoblanadi.

Emergency Medicine formasini tugatganimdan keyin NBME 10 ni ishladim. Natija - 74% = 242. Shundan so‘ng qolgan barcha CMS formalarini tugatishga qaror qildim va faqat keyin practice testlarga o‘tishni rejalashtirdim.

CMS bilan birga MatchGuy tomonidan tayyorlangan High Yield fayllarni ham o‘qirdim. U ushbu fayllarni email obunasiga yozilganlarga bepul yuboradi. Bu materiallarni o‘qish menga juda yoqardi. Fayllarning formati juda qulay edi: savol (kichik klinik case), javob. O‘qish zerikarli bo‘lib qolmasligi uchun ushbu fayllarni Claude sun'iy intellektiga yuklardim. Claude'dan CSV fayllar yaratish uchun faol foydalanardim. Keyin ularni tayyor Anki kartalariga aylantirardim. Bu usul juda yaxshi ishladi. Materiallarni ham o‘qish, ham takrorlash ancha tezlashdi.

Divine Podcast va High Yield YouTube videolarini ham sinab ko‘rdim. Ammo birinchi urinishlardanoq tashlab yubordim.

Agar qaytadan boshlaganimda nima qilgan bo‘lardim?

-MatchGuy'ning barcha High Yield fayllarini UWorld incorrectlarini ishlayotgan paytimdayoq yoki Amboss davrida o‘qib chiqardim. Chunki practice testlarga o‘tgunimcha ularning barchasini tugatishga ulgurmadim. Natijada qolganlarini practice testlar orasida o‘qishga majbur bo‘ldim.

-NBME 10 ni CMS formalarining oxiriga qoldirgan bo‘lardim.

4-bosqich: NBME + Amboss High Yield

Davomiyligi - 2 oy.

Menda alohida dedicated period bo‘lmagan. Buni ataylab shunday qildim. Aksincha, tayyorgarlik oxiriga yaqin yuklamani asta-sekin kamaytirishga harakat qildim. Qolgan barcha practice testlarni ishladim. Har bir practice testni tahlil qilayotganda xatolarimni quyidagi toifalarga ajratardim:

1. Knowledge gap - fakt yoki konseptni umuman bilmaslik.
2. Memory failure - fakt yoki konseptni bilganman, lekin eslay olmaganman.
3. Reasoning error - e'tiborsizlik yoki ortiqcha tahlil qilish (overthinking).

Qaysi turdagi xatolar ko‘proq uchrasa, keyingi practice testgacha tayyorgarligimni shunga qarab o‘zgartirardim. Masalan: agar muammo xotirada bo‘lsa - Anki kartalarini ko‘proq takrorlardim; agar muammo reasoning bo‘lsa - o‘zimdagi fikrlash xatolarini tahlil qilib, ular ustida ishlardim. Practice testlar orasida odatda 5-6 kun tanaffus qoldirishga harakat qilardim, shunda yangi bilimlarni mustahkamlashga vaqt bo‘lardi. Yangi imtihon formatiga moslashish uchun UWorldni 20 ta savollik bloklar ko‘rinishida ishlardim. NBME 13 dan boshlab oxirgi practice testlar oralig‘ida Amboss Study Plan'larini ham tugatdim: Risk Factors; Screening & Vaccinations; Ethics; Safety & Quality Improvement; Patient Charts; Step 2 imtihonida deyarli har doim uchraydigan 200 ta konsept.

Natijalarim:

21-aprel - NBME 11 = 243

26-aprel - UWSA 1 = 240

30-aprel - NBME 12 = 245

11-may - UWSA 2 = 251

19-may - NBME 13 = 252

5-iyun - NBME 14 = 246

9-iyun - NBME 15 = 243

12-iyun - Old Free 120 = 78,3%

13-iyun - Free 120 = 76,7%

14-iyun - NBME 16 = 255

16-iyun - Real Exam = 254

Agar qaytadan boshlaganimda nima qilgan bo‘lardim?

Hech narsani. Menimcha, bu bosqichda hammasini to‘g‘ri bajarganman.

REAL EXAM

Anqaradagi Prometric markazi menga Istanbuldagisidan ko‘ra ko‘proq yoqdi. Hammasi tinch, qulay va keng edi. Shaxsiy buyumlar uchun shkafchalar keng. Hojatxona ham imtihon xonasiga juda yaqin joylashgan. Xodimlar juda xushmuomala edi. Tanaffus vaqtida tekshiruvlarni iloji boricha tezroq o‘tkazishga harakat qilishardi. Agar faqat imtihon topshirish uchun uchayotgan bo‘lsangiz, bemalol Anqarani tavsiya qilaman.

Men imtihonni yangi formatda topshirdim. Har bir blok 20 ta clinical case'dan iborat edi. Faqat ikkita blokda 18 tadan savol bo‘ldi. Bu bloklarning farqi shundaki, ularda drug advertisement yoki abstract bo‘yicha uch qismdan iborat savollar mavjud edi. Har bir blokda taxminan 3-4 ta Patient Chart uchradi. Har bir toq raqamli blokdan keyin joyimda o‘tirgan holda 30-45 soniyalik kichik tanaffus qildim. Har bir juft blokdan keyin esa tashqariga chiqib 4-5 daqiqa davomida nimadir yeb oldim.

To‘rtinchi blokdan keyin Trimol tabletkasini ichdim. Oltinchi blokdan boshlab har bir tanaffusda Red Bullni oz-ozdan icha boshladim. Bu menga tetik qolishga yordam berdi va shu bilan birga kuchli taxikardiya rivojlanishining oldini oldi. Umuman olganda, yangi imtihon formati eski formatga qaraganda ancha qulayroq ekan. Unda inson tez charchamaydi va butun blok davomida diqqatni ushlab turish osonroq bo‘ladi. Savollar uslubi jihatidan eng ko‘p NBME 16 ga o‘xshardi. Qiyinligi esa practice testlardan biroz yengilroq tuyuldi. Shaxsan menga deyarli experimental savollar uchramagandek tuyuldi.

Javobni aniq bilmagan savollarda tasodifiy belgilash o‘rniga logical guess usulidan foydalandim. Ya'ni eng noto‘g‘ri variantlarni chiqarib tashlab, qolgan javoblardan eng mantiqli javobni tanladim. Har bir blokda shunday taxmin qilishga to‘g‘ri kelgan savollar soni taxminan 4-6 ta edi. Oxirgi blok tugagach esa monitor oldida shunchaki o‘tirib qolgan ekanman.

Xodima yonimga kelib: "Imtihon tugadi", - deb aytgandan keyingina o‘rnimdan turdim. 😂 Natijani olganimdan keyin tayyorgarlik davridagi barcha qiyinchiliklar birdaniga yodimdan chiqdi va yelkamdagi og‘ir yuk tushib ketgandek bo‘ldi.

Maslahatlar

• Tayyorgarlikni boshlashdan oldin Medcloud'ning Zero Lesson darslarini va "Deep Work" kitobini o‘qing. Bu juda mustahkam poydevor bo‘ladi.
• O‘qishni romantizatsiya qilmang. Och qolish yoki uyqusiz tunlar o'tkazishning hojati yo‘q. To‘g‘ri ovqatlaning, yetarlicha uxlang, muntazam o‘qing va haftasiga kamida bir kun dam oling.
• Sog‘lig‘ingizga e'tibor bering. Imtihon tugaydi, ammo tayyorgarlik jarayonining salbiy oqibatlari qolishi mumkin.
• Tayyorgarlik jarayonini o‘zingiz uchun murakkablashtirmang. Qaysi bosqichda bo‘lishingizdan qat'i nazar, practice test natijalaringiz qanchalik past bo‘lmasin, aslida faqat ikkita yo‘l bor. Vaziyatni yaxshilashga harakat qilish yoki vaziyatni yomonlashga harakat qilish. Aslida hammasi shunchalik oddiy.
• Agar bir kun kelib "Umuman imtihon topshirishga arziydimi?" degan fikr paydo bo‘lsa, bu haqda ortiqcha o‘ylamang va tayyorgarlikni davom ettiring. Tayyorgarlik davomida siz hech narsa yo‘qotmaysiz. Aksincha, juda qimmatli bilimlarga ega bo‘lasiz. Imtihondan muvaffaqiyatli o‘tsangiz esa qo‘lingizda siz kutmagan imkoniyatlar eshigini ochishi mumkin bo‘lgan sertifikat bo‘ladi. Hali mavjud bo‘lmagan muammolar bilan boshingizni band qilmang. Inson qo‘rqadigan narsalarning aksariyati hech qachon sodir bo‘lmaydi.

Minnatdorchilik

• Javohirga - butun tayyorgarlik davomida bergan bebaho yordami va mentorligi uchun.
• Muso va Timurga - tayyorgarlikning oxirgi bosqichlarida rejamni to‘g‘rilash bo‘yicha bergan qimmatli maslahatlari uchun.
• Muhammadsaid, Jamshid, Diyora, Mushtari va Anoraga - study buddy bo‘lganlari va barcha foydali muhokamalar uchun.
• Medcloud jamoasiga va ayniqsa Farhod akaga - mustahkam bilim bazasini yaratib berganlari, yordam va maslahatlari hamda har doim savollarga javob topish mumkin bo‘lgan kuchli hamjamiyatni shakllantirganlari uchun.
• Oila a'zolarim va yaqinlarimga - ayniqsa men o‘zimga ishonmay qolgan paytlarda ham meni qo‘llab-quvvatlaganlari, g‘amxo‘rlik qilganlari va menga ishonganlari uchun.

Barchaga omad tilayman!

Bog`lanish uchun kontakt: @Khojiakbar_Nazarov

Yaqinda imtihonni topshirgan talabalar hisoboti:

1. USMLE STEP 1 - PASS | Diyora

...aynan shu sinovlar ichidan o‘tarkanmiz, ular bizni bir paytlar so‘ragan ne’matlarimizga tayyorlab boradi.

Hisobotni o'qish

2. USMLE STEP 2 CK - 240 | Javokhir

...bu yo‘l men uchun hech qachоn oson bo‘lmagan va men buni allaqachon qabul qilganman. Har bir bosqich mehnat, shubha, bedor tunlar, qayta-qayta boshlash bilan kelgan. Ammo aynan shu meni kuchli qildi.

Hisobotni o'qish

3. USMLE STEP 1 - PASS | Nurjakhon

... USMLE yo`lida men inson sifatida ulg‘aydım, o‘zgardim, atrofimdagi odamlar, dunyoqarashim o‘zgardi va uzoq orzu qilgan shaxsga aylandim. Bu uzun va mashaqqatli yo‘ldan o‘tganimdan aslo afsuslanmayman

Hisobotni o`qish

Foydali havolalar:

Veb-sayt: https://www.medcloud.uz

Telegram: https://t.me/medcloud

Telegram bot: https://t.me/medcloudsbot

Instagram: https://www.instagram.com/medcloud_uz