invoice.uzasbo.uz да ҳисобварақ-фактураларни ғазначилик органларига электрон жўнатиш тартиби

invoice.uzasbo.uz да рўйхатдан ўтиш бўйича маълумот берилганди. Энди бюджет ташкилотлари томонидан шу вақтгача new.mdm.uz дан ғазначилик органларига электрон жўнатилган ҳисобварақ-фактуралар бу ерда қай тартибда жўнатилиши бўйича маълумот берилади.

invoice.uzasbo.uz га дастлаб кирилганда қуйидаги ойна чиқади. Чап томондан Ҳисобварақ-фактура га тегишли меню топиб олинади ва ундан Ҳисобварақ-фактура рўйхати банди танланиб кирилади.

Ҳисобварақ-фактура рўйхати банди танлаб кирилса, қуйидаги ойна чиқади.

Ташкилотлар ҳисобварақ-фактураларни бошқа ташкилотларга юборади ёки қабул қилади.

1. Ташкилот бошқа ташкилотларга товарлар сотса ёки иш, хизматлар кўрсатса, бунда сотилган товар (иш, хизмат)лар учун ҳисобварақ-фактура тақдим этади. Бу каби ҳисобварақ-фактуралар Юборилган қисмида кўринади.
2. Агар ташкилотга бошқа ташкилотлар товарлар сотса ёки иш, хизматлар кўрсатса, бунда сотиб олинган товар (иш, хизмат)лар учун ҳисобварақ-фактура қабул қилиб олинади. Бу каби ҳисобварақ-фактуралар эса Қабул қилинган қисмида кўринади.

Бюджет ташкилотлари эса, одатда, фақат товар (иш, хизмат)лар сотиб олувчи бўлади. Ҳисобварақ-фактура рўйхатига дастлаб кирилганда эса Юборилган ҳисобварақ-фактуралар кўрингани учун ҳеч қандай маълумот чиқмайди. Шунинг учун Қабул қилинган ёзуви устига босиб, бюджет ташкилотига электрон тарзда келиб тушган ҳужжатларни кўриш мумкин (28.09.2020 санадан бошлаб автоматик тарзда Қабул қилинган ҳисобварақ-фактуралар қисми кўринадиган қилинди.)

Бу ерда келиб тушган ҳисобварақ-фактуранинг ҳолати дастлаб Новая бўлади. Бюджет ташкилотлари уни аввал ғазначилик органларига электрон жўнатиб, у ерда тасдиқдан ўтгандан сўнггина Қабул қилиш тугмасини босиб, қабул қилишлари мумкин. Ғазначилик органларига электрон жўнатмасдан қабул қилинган ва Принят ҳолатга ўтган ҳисобварақ-фактураларни кейин ғазначиликка жўнатиб бўлмайди (28.09.2020 санадан бошлаб лот рақами бўлган ҳисобварақ-фактураларни қабул қилишга чеклов киритилди. Шунингдек, бошқа операторларда ҳам шундай чеклов мавжуд, хусусан, my.soliq.uz да.)

Ҳужжатни ғазначиликка жўнатиш учун унинг бошига байроқча қўйиб белгилаб олинади ва Отправить в Казначейство тугмаси босилади.

Агар бунда ўнг томонда танланган ҳисобварақ-фактура чиқмай, Имзолаш учун ҳужжат йўқ ёзуви чиқса, етказиб берувчи томонидан ҳисобварақ-фактурани электрон жўнатишда бюджет ташкилотига тегишли 27 разрядлик шахсий ғазна ҳисобварақ кўрсатилмаган бўлади (Бунда 28.09.2020 санадан бошлаб огоҳлантириш ҳам чиқадиган қилинди.)

Буни ўша ҳисобварақ-фактура устида сичқончанинг чап тугмасини икки марта босиб ёки Амаллар устунидаги Ўзгартириш тугмаси орқали очиб кўриш мумкин. Шунингдек, бу ерда ғазначиликка жўнатилган ҳисобварақ-фактуранинг протоколини ва танланган ҳужжат устида бажарилган амаллар бўйича тарихни кўриш бўйича тугмалар ҳам мавжуд.

Қуйидаги расмда кўриниб турганидек, Харидор бўлган бюджет ташкилотининг маълумотларида 27 разрядлик шахсий ғазна ҳисобварақ кўрсатилмаган. Шунингдек, етказиб берувчи бу ерда лот рақамини ҳам кўрсатиши керак, у ҳам кўрсатилмаган.

Мазкур ҳисобварақ-фактурадаги камчиликларни тўғрилаши учун Рад этиш тугмаси орқали уни етказиб берувчига қайтариб юбориш керак.

Мазкур ҳолатда яна қуйидагиларни ҳисобга олиш керак:

1. Етказиб берувчилар томонидан юборилган ҳисобварақ-фактуранинг спецификация қисмидаги Товар (иш, хизмат)лар номи устунида харажат коди икки томондан панжара ичига олинган ҳолда ҳам кўриниб туриши керак. Акс ҳолда мазкур ҳисобварақ-фактуралар ғазначиликка жўнатилгандан сўнг қабул қилинмасдан қайтиб келади (Протоколда Спецификация счет-фактуры, Статья расхода '0' не найден в справочнике хатолиги билан. 28.09.2020 санадан бундай ҳисобварақ-фактураларни ғазначиликка жўнатишга ҳам чеклов киритилди ва харажат коди кўрсатилмаганли бўйича тегишли огоҳлантириш чиқади). Бунда ҳам уни тўғрилаб жўнатилиши учун етказиб берувчига қайтариб юбориш керак бўлади.
2. Бошқа электрон ҳисобварақ-фактура айланиш тизими операторларида қабул қилиб қўйилган ҳисобварақ-фактуралар ёки invoice.uzasbo.uz нинг ўзида қабул қилинганларни юқорида айтиб ўтилганидек, ғазначиликка жўнатиб бўлмайди. Чунки фақат Новая ҳолатдаги ҳужжатларни жўнатиш имкони мавжуд. Бунда етказиб берувчилар мазкур ҳисобварақ-фактураларга тузатиш киритиш бўйича қўшимча ҳисобварақ-фактура жўнатишлари керак бўлади. Буни барча электрон ҳисобварақ-фактура айланиш тизими операторларида амалга ошириш мумкин, қай тартибда қилиниши бўйича ўзлари фойдаланаётган оператордан маълумот олишлари мумкин.
3. Шу пайтгача new.mdm.uz орқали электрон тарзда ғазначилик органларига жўнатилган ҳисобварақ-фактуралар invoice.uzasbo.uz орқали қайтадан жўнатилмайди. Шу сабабли уларнинг етказиб берувчилар томонидан қайтадан жўнатилиши ҳам талаб этилмайди. Шунингдек, invoice.uzasbo.uz дан бошқа электрон ҳисобварақ-фактура айланиш тизими операторларида қабул қилиб қўйилган ҳисобварақ-фактуралар бу ерда автоматик тарзда кўринмайди. Агар улар шу вақтгача ғазначилик органларига жўнатилмаган бўлса, 2-бандга асосан етказиб берувчилар мазкур ҳисобварақ-фактураларга тузатиш киритиш бўйича қўшимча ҳисобварақ-фактура жўнатишлари керак бўлади. Агар улар ўзи new.mdm.uz орқали жўнатилган ва ғазначилик органлари томонидан қабул қилинган бўлса, қўшимча бошқа иш қилиш шарт эмас.
4. Товар (иш, хизмат) етказиб берувчилар ҳисобварақ-фактурада бюджет ташкилотининг шахсий ғазна ҳисобварағини ёки лот рақамини кўрсатиш имкони бўлиши учун invoice.uzasbo.uz да рўйхатдан ўтиши талаб этилмайди. Улар одатдагидек ўзлари фойдаланадиган электрон ҳисобварақ-фактура айланиш тизими операторлари орқали ҳисобварақ-фактураларни электрон жўнатишади ва бу имконият барча операторларда мавжуд.
5. Товар (иш, хизмат) етказиб берувчилар лот рақамини аниқлай олишмаса, ўзлари товар (иш, хизмат) сотаётган бюджет ташкилотига мурожаат қилган ҳолда буни аниқлашлари мумкин. Шунингдек, http://xarid.uz/dxarid/deals манзилида ҳам бюджет ташкилотлари томонидан амалга оширилган давлат харидлари билан боғлиқ барча шартномалар бўйича маълумотлар кўриниб туради.
6. Амалиётда ҳисобварақ-фактуралар кўп учрайди. Лекин агар ташкилотга етказиб берувчилар томонидан бажарилган ишлар далолатномаси жўнатилган бўлса, унга қўшимча равишда ҳисобварақ-фактура ҳам расмийлаштирилиши керак бўлади. Жўнатилган бажарилган ишлар далолатномасини кўриш учун invoice.uzasbo.uz нинг чап томонида Акт менюси топилади ва ундаги Актлар рўйхати банди танлаб кирилади.