Мирзаободлик  “СПРИНТ”чилар

Енгил атлетика спортида энг қисқа масофага тез югуришни “спринт” дейилади. Ҳамза Олтмишев раҳбарлигидаги Гулистон шаҳри-Наврўз шаҳарчасига (туман марказининг номи) қатновчи маршруткалар кейинги пайтларда кечки маҳали кам кўринадиган бўлиб қолди. Ишдан, ўқишдан қайтаётган йўловчилар онда-сонда кўриниб қолаётган маршруткаларнинг ортидан югуриб тезроқ чиқиб олиш пайида бўлишмоқда. Кеча, бугун шундай “спринтчи”ларни ўзим кузатиб, ичим ачиб кетди. Айниқса, ёши улуғлар югуришда оқсаб қолишаяпти. Болаларда эса тезлик дуруст. Бироқ катта катта-да. Маршруткага амал-тақал қилиб етиб борган заҳоти, болаларни тушириб юбориб, жойларини эгаллаб олишаяпти.

Бу ҳолат ҳақида бир ҳафта бурун маршруткачиларнинг бошини қўшиб юрган катталари Ҳамза Олтмишевни огоҳлантирган эдик. Гапимиз кор қилмаган кўринади. Кечга бориб машиналарнинг қораси кўринмаяпти. Йўловчиларнинг гапларига қараганда Наврўз шаҳарчасидан шаҳарга кечки пайт йўловчи бўлмас эмиш. Унда шаҳардан туман марказига борадиганлар нима қилишсин? Ё оёқларини қўлга олиб спринча югуриш билан манзилига кетаверсинми?

ҲАҚГЎЙ

https://t.me/MuhammadaliAhmadUz