DCCC291_林官問題稿
法庭文字直播台話説偵緝警長52861在凌晨一時許，將首被告的父母帶返青衣警署「協助調查」，林偉權法官對此非常不滿：
官：點解個仔間房有兩支伸縮棍你要拉埋佢父母呢？咁如果佢有阿爺阿嫲，咁你係咪又帶埋佢走呢？個問題係有咩理由需要父母、長輩都去埋 (警署) 啊？
警：原因係有理由相信其父母涉及其中，所以要帶父母返警署作調查。
官：就因為嗰支棍係屋企裡面，咁所以屋企嘅長一輩都要帶晒返去，係咪啊？
警：係，無錯。
官：咁如果仲有長一輩阿爺阿嫲呢？咁帶唔帶埋佢哋返去啊？
警：我會作出一個評估，當時嘅評估係需要將父母帶返青衣警署調查。
官：你都未答我問題，如果仲有上一輩係度，你會唔會話咁當時我都會帶埋返去？
警：都會嘅。
官：目的係咩啊？
警：目的就係澄清返如果係涉案嘅，就帶返警署調查，但我唔係拘捕佢吖嘛。
官：即係佢可以話唔返？
警：當然啦，如果佢拒絕嘅話，可以嘅。
官：咁你就由佢啦？
警：咁我就安排啲人手係現場同佢錄取口供囉。
官：咁點解唔係現場就問多啲，睇下有無需要帶呢對父母返去呢？嗰陣時又係凌晨，隨便帶市民返去嘅咩？
警：法官大人呢個係我嘅決定。
官：我知呢個係你個決定啊，呢個係我嘅問題。我就係想知道點解你覺得有需要將成家人帶晒返去啊！你都唔係答我問題，你衹不過係不斷重複我問緊嘅問題。問題係點解唔可以係家中作出進一步調查，問到有可疑先帶返警署呢？市民隨便畀你係任何時間，特別係深夜騷擾嘅咩？
警：法官大人我明白㗎，所以我帶佢哋返去係調查唔係拘捕㗎嘛，同埋如果佢係拒絕嘅，我咪安排人手即場錄取口供。
官：點解係本末倒置呢？點解唔係先安排人手問吓先，問到有可疑先帶返去，問唔到就唔好騷擾人啦係咪啊？
警：明白，法官大人。
官：同埋點解要一點出動啊？你哋幾點上班㗎？
警：2020年8月3日早上08:30。
官：點解要去到凌晨先至出發去人哋屋企啊？
警：因為我哋本身要梳理資料，嗰度都去咗一啲時間。
官：咁既然都拖咗咁耐囉，點解唔等到聽日一個較好嘅時間先呢？
警：咁行動上警方立場希望可以儘快拘捕到嫌疑人。
官：既然你話要儘快，咁我又唔係好理解點解由朝頭早八點等都凌晨一點先出動.
警：因為得知嫌疑人啲資料嘅時候唔係喺朝頭早㗎嘛。
官：幾時啊？幾時得到啲資料，幾時開始梳理工作搞到要凌晨先至出發去人哋屋企？
警：我記得要傍晚，夜晚十一點至十二點，先至確實疑人住邊個單位。
－－－－－－－－－－－－－－－－－－－
稍後辯方就處理被告的程序盤問警長52861......再次提起上述議題：
官：其實你哋帶佢父母返差館係打算問啲咩㗎？
警：問返佢哋知唔知伸縮棍屬於邊個？幾時見到？
官：咁呢啲唔可以係屋企做嘅咩？如果你講得咁簡單，係屋企問囉！「你知唔知你個仔有兩支伸縮棍啊？」、「知唔知佢收埋啊？」，唔可以係屋企問嘅咩？
警：我同意可以係屋企問嘅，但我當時決定係帶返差館。
官：咁如果可以係屋企問，又點解要人哋冚家噉樣帶返晒差館？
警：帶返差館呢個比較合適、舒適嘅地方，同埋我地要同佢筆錄口供。
官：點樣差館舒適過屋企呀？
警：因為當時我個決定就係噉樣。
官：而家就係要去研究吓你嗰決定囉，點解有個咁嘅決定，你要解釋畀我哋聽㗎......點解需要帶埋人哋一對父母，係凌晨一時本來應該瞓覺嘅就返去差館，仲話嗰度舒適啲！
警：原因就係正如我頭先所講，第一......(唔重複啦自己睇返上面)
官：筆錄口供唔可以邀請人哋係第二日，即係你哋嘅辦公時間，佢哋正常嘅清醒時間去錄嘅咩？
警：當然可以啦。
最後林官側頭瞥視證人後，示意辯方律師繼續盤問。
－－－－－－－－－－－－－
今日其餘案情按以下連結：