⏺辯方法律代表盤問PW2 警員9917
辯:警員,就住呢一宗案件你係落過兩次書面口供,係咪?
PW2:係
辯:一份就係喺2020年5月10日2020時錄嘅,係咪?
PW2:係
辯:記唔記得呢份口供喺邊度落㗎?
PW2:當其時我係喺旺角警署做完啲拘捕程序之後喺嗰邊落嘅
辯:2020時係咪?
PW2:係
辯:落咗幾耐啊呢份口供?
PW2:大概兩個零鐘到
辯:即係2020左右去到十點零?
PW2:係,差唔多
辯:你喺口供上面有冇寫到錄完口供嘅時間?
PW2:有
辯:「2020-05-10,2200HRS」,相信呢個就係你錄完口供嘅時間嚟?
PW2:係
辯:喺你口供嘅第三頁、第廿二段,你講到:「於同日2030時至2155時由警員15126協助整理案件證物」。呢度講個時間就係2030-2115啦係咪?呢段時間你啱啱唔係同法庭講錄緊口供㗎咩?
PW2:我錄緊口供
辯:呢一部分你冇參與?
PW2:冇
辯:第二十三段:「於同日2206時由警員15126交案件證物予重案組第一隊偵輯警員0932,並由警員15126於記事冊號碼6207346內簽署」第二十四段,你寫到「於同日2339時向值日官提取AP」第二十五段:「 於同日2342至2347時由警員15126交還,無需交還財財物AP及簽署」以上向你你讀出嘅事情全部都係喺晚上2200之後發生嘅事情嚟,點解你會寫咗落口供?
PW2:其他嘢係之後嘅時間,警員15126通知我寫返落去
辯:你而家嘅講法係,其實2200並唔係你錄完口供嘅時間,係咪?
PW2:呢個時間係我紀錄曬我拘捕嘅詳情嘅時間嚟
辯:咁你到底幾時錄完呢一份口供啊?
PW2:我淨係紀錄低我寫曬拘捕詳情同埋拘捕時間喺後面,至於後面其他內容嗰度我冇紀錄低
辯:即係你響右下方印個呢個「2020-05-10,2200HRS」嘅呢個時間就唔包括你問警員15126調查被告嘅過程嚟?
PW2:唔包括
辯:咁點解呢個時間列印嘅地方會出現喺所有紀錄嘅最尾?
PW2:可唔可以講多次個問題?
辯:點解呢個晚上2200嘅時間會出現喺所有紀錄嘅最尾?
PW2:因為我昨晚所有拘捕詳情嘅紀錄,我就已經寫咗個時間,就完成咗呢度。至於之後問警員15126啲時間,我就完備返啲內容,就加返落去,但係我之後就冇??
辯:你知道呢一份口供你係可以隨意做更改、修補或者增加㗎嘛?
PW2:知道
辯:喺你紀錄警員15126同你講嗰個嘅部分嘅時候,你有冇諗過增添埋你紀錄呢個部分嘅時間啊?
PW2:冇
辯:我想問你,係咪第一次落呢個書面口供啊?係咪你當差十一年嘅第一份書面口供?
PW2:唔係
辯:你之前落過幾多份書面口供?
PW2:我記唔到
辯:約數啊,唔需要確切
PW2:十份到啦
辯:十份左右。同唔同意喺一份書面供詞裡面你紀錄嘅時間係重要㗎?
PW2:同意
辯:咁點解當時你冇諗起要紀錄你作增補嘅呢個時間呢?
PW2:因為我覺得最重要就係我拘捕佢個過程嘅內容。之後啲時間我就冇諗返起咁多啦,當時都有好多工作要做,同埋已經係凌晨時間。嗰段時間我基本上冇返過屋企,全部時間都係做嘢,精神好緊張、緊湊
辯:警員,咁係咪即係你嘅講法係,2200之後你冇再處理過任何關於被告嘅事情?
PW2:唔係
辯:咁喺幾時再處理過?
PW2:除咗處理咗警員15126呢個口供嘅內容之後,返到去水警西區嗰度都要做埋補錄新嘅記事冊嘅內容
辯:你喺主問嘅時候提過,你同警員15126有分工嘅,你負責調查被告本人,15126調查佢嘅物品,係咪?
PW2:係
辯:你見唔見到警員15126嘅搜查情況?你當時嘅回應係你向被捕人調查,對住被告,所以15126去點樣攞嗰啲物品你係睇唔到嘅?
PW2:我將精神專注咗喺被告嘅調查當中
辯:所以啲物品係點樣攞出嚟你係睇唔到?
PW2:我嗰一刻專注喺被捕人嗰度,我冇專注喺佢點樣搜查嗰度
辯:咁即係你同唔同意係望唔到呢?
PW2:有機會望到,雖然我唔係專注喺嗰度
辯:就住白電油,你話係警員15126話俾你知搜出咗白電油嘅,係咪?
PW2:佢喺我身邊俾我見到有呢樣嘢,唔係淨只係話,我有見到呢樣嘢
辯:咁你第一次見到呢個白電油嘅時候,佢嘅狀態係咪喺警員15126手上面啊?
PW2:係
辯:剛才,你話你嚟到現場嘅時候就已經有啲衫攤咗喺地下,係咪?
PW2:係
辯:至於你講嘅一啲思疑係毒品嘅物品,係由警員15126搜到,同你講,定係你睇到,定係點樣㗎個情況?
PW2:我發現啲物品係由警員15126顯示比我知嘅
辯:你第一眼見到你思疑毒品係喺15126手上面嘅,係咪?
PW2:我嘅記憶係,係嘅
辯:警員,喺你2020年5約10日個書面供詞裡面,你喺第六段有描述:「在我調查期間,見AP所背的背囊內發現一個透明膠袋,裝住一個未開啟的黃色金屬長罐」。呢一部分嘅紀錄,同唔同意你話你見到呢個黃色金屬長罐係喺個背囊裡面㗎?
PW2:唔同意
辯:咁點解你會喺紀錄上面寫住見AP所背的背囊內發現一個透明膠袋,裝住一個未開啟的黃色金屬長罐呢?
(控方反對問題,辯方收回)
辯:喺之後你就有做一啲紀錄,都係第六段啦。「再加上我喺AP背囊發現另有五件衫一條褲」。警員,同唔同意呢個部分你嘅講法係呢五件衫、一條褲你係見到喺個背囊裡面㗎?
PW2:唔同意
辯:咁點解你個用詞會係「我喺背囊發現」呢?
PW2:因為一開始警員12760同我講係啲物品喺背囊搜出嚟,然後攤咗喺地下。我想清晰表達出嚟,所以咁寫
辯:同唔同意呢個部分你嘅紀錄就唔係「我係警員12760」啊?你寫嘅係你發現喎?呢一度嘅寫法係你喺被告嘅背囊到發現㗎喎?
PW2:我唔認同
辯:喺第一份口供裡面,你有冇提及過警員12760曾經向你交代攤喺地下嘅物品係由佢搜出嘅?
PW2:當其時,我所知道地下嘅物品就係15126從背囊攞出嚟攤喺地下,所以之後都需要補充個口供
辯:但係呢一個部分嘅證供,你係去到2020年5月31日嘅口供先第一次提出,同唔同意?
PW2:同意
辯:你喺2020年5月10日口供嘅第八段咁寫:「隨後我亦發現AP背囊內有一個已經開封並印有IT’S YOUR CHOICE及印製圖案膠袋,裡面有深啡色思疑大麻。」。同唔同意你嘅講法係你發現呢啲思疑大麻?
PW2:唔同意
辯:咁你點解會用「我亦發現」呢?
PW2:因為我所講嘅發現唔係我搜出嚟
辯:去到2020年5月31日嘅嗰一份口供,你都有補充到一啲關於證物嘅細節,係咪?
PW2:係
辯:喺第三段:「於2020年5月10日下午五時正,...(讀得頗快,手速跟唔上)旺角新世紀廣場???警員??告知我截停男子(AP),後把從背囊搜出之物品攤在地上。經調查後,AP共有以下物品,tan在地上物品如下」同唔同意你喺呢一份口供嘅講法係12760講呢兩樣物品攤在地上啊?
PW2:呢啲資料係我地嗰個案件主管要求我地加添返落去,我當時係冇留意到個現場情況
辯:即係換句話講,你喺呢度寫「攤在地上物品如下」就唔係妳自己嘅認知嚟嘅?係案件主管同你講嘅?
PW2:呢啲資訊係之後知道嘅,唔係我嗰一刻所知道
辯:咁我見到你有寫「調查之後」啦,但係你都有寫攤在地上,咁攤在地上嘅物品有冇人知㗎當時?
PW2:當時我冇留意呢啲物品,因為當時我專注調查被捕人
辯:所以呢啲物品都係後來其他調查人員同你講嘅?
PW2:因為我現場冇點算過呢啲物品,所以呢啲物品唔係我現場點算,所以係調查所得嘅資訊嚟
辯:即係換句話講,係佢哋同你講呢啲物品攤在地上嘅?
PW2:係
辯:但係喺你嘅記憶入面,呢個白色碎布同埋白電油第一次見到就係喺15126手上面?
PW2:有一塊喺我搜出嚟嘅
辯:你第一眼見到五塊碎布同埋白電油之後,佢哋有冇被攤在地上?
PW2:呢個我唔知,我係專注緊調查被告
辯:我向你指出,今天你喺庭上面話自己沒有處理證物嘅呢一個講法係虛構嘅,同唔同意?
PW2:唔同意
辯:我亦都向你指出,你話你第一眼喺喺15126手上面看看五個白色碎布同埋白電油嘅講法係虛構嘅,同唔同意?
PW2:唔同意