⏺助理檢控官 #鄧梓聰高級檢控官 覆問PW32警員16732 林卓賢

控：問到其中兩個問題你不同意嘅，係關於你同第十三被告倒地嘅環節。田大律師有個問題就係話第十三被告向前跑，俾你向後拉，理應係背脊落地，不是向前跌、面向地，同唔同意？你當時係答不同意嘅係咪？

PW28：係

控：進入下一個問題，田大律師再問根據你嘅說法，第十三被告應該係面向皇后街嘅方向向前跑嘅，就算佢向前跌、面向地，佢個頭都應該係向皇后街個方向先合理嘅，你當時嘅答案都係不同意嘅，記得嗎？

PW28：記得

控：我關注嘅環節係講緊第十三被告向前跌呢樣嘢。你喺主問嘅時候講到關於你拉第十三被告嘅背囊，及後兩人一齊倒地嘅時候呢，就冇講過第十三被告有向前跌呢個情況嘅。我想向你澄清，其實喺你拉第十三被告嘅背囊之後呢，第十三被告有冇向前跌嘅呢個動作？

PW28：大家一齊失平衡啦嗰陣，跟住就一齊跌。唔係向前跌。

控：咁我想搞清楚，你見到第十三被告向皇后街方向跑啦？

PW28：係

控：你喺佢嘅身後拉佢嘅背囊，向你個方向拉啦？

PW28：係

控：到及後倒地，你盤問都有講到當時佢嘅面係向西面、腳向東面嘅，記得嗎？

PW28：記得

控：你講唔講到由拉嘅呢個動作，去到最後第十三被告頭向西、腳向東呢度中間係點樣發生㗎？

PW28：咁我捉住佢背囊，向我個方向拉，然後佢就向皇后街方向走，經過拉扯之後，失平衡，然之後打側跌咗落地下。然之後佢當時嘅位置就係頭向西面、腳向皇后街。咁我就一路撳住佢背脊，唔俾佢走。