Қозоғистон биринчи президенти Назарбоев СССР парчаланиши ҳақида гапириб берди
Қозоғистон биринчи презинденти Нурсултон Назарбоев СССР парчаланиши ҳамда Михаил Горбачёв ва Борис Ельцин ўртасидаги қарама-қаршилик ҳақида гапириб берди. Бу ҳақда «Knews» хабар берди.
Маълум қилинишича, Қозоғистон биринчи президент СССР парчаланиши ҳақидаги хотираларини «QAZAQ: Олтин одам қиссаси» фильми учун берган интервьюсида очиқлаган.
«Горбачёв мендан 10 ёш катта эди, лекин биз бир авлодмиз. Иккимиз ҳам бир хил сиёсий таълимдан ўтганмиз. Биз бир-биримизни билардик. Бир тизимдан чиққандик», — дейди Назарбоев.
Унинг сўзларига кўра, Ельцин ҳам у билан дўст бўлишни хоҳлаган. Шу боис у билан ҳам жуда яхши муносабатда бўлинган. Кейинчалик Михаил Горбачёв ва Борис Ельцин ўртасида қарама-қаршилик юзага келганини кўриб, уларни яраштиришга ҳаракат қилган.
«Совет Иттифоқи парчаланишининг лаҳзаларидан бири. Субъектив. Бу Горбачёв ва Ельцин ўртасидаги кескин рад этиш эди. Ельцин Горбачёвнинг таклифига биноан Москвага келган. Совет Иттифоқи Коммунистик партияси марказий комитетининг котиби. Лекин у Сиёсий бюро аъзоси бўламан деб ўйларди. Аммо Горбачёв уни ҳеч қачон у ерга олмаган. Ельцин эса жуда амбицияли одам эди. Ғурурли эди. Бу уни хафа қилди», — дея таъкидлаган Нурсултон Назарбоев.
Қайд этилишича, айнан шундан — Ельциннинг норозилигидан мухолифат фойдаланиб, уни Горбачёвдан узоқлаштиришни бошлаган.
«Мен уларнинг қарама-қаршилиги чўққисини кўрганман. Горбачёвнинг кабинетида ўтирган эдим. Ельцин кириб келгач, улар баланд оҳангда гаплаша бошлади. Бу ёқимсиз ҳолат эди. Ельцин ‘Мен сизнинг ўрнингизга ўтираманʼ, — деди. Мен ўрнимдан туриб, кетмоқчи бўлганимда Горбачёв ‘Ўтир’, дея Ельцинга қараб, ‘Ҳозир мен президент’, — деб жавоб қайтарди. Ельцин эса ‘Ҳа. Хайр’, деб чиқиб кетди. Ўша пайтдаги нафрат Ельциннинг кўзини кўр қилиб қўйди. Унинг битта орзуси бор эди — Горбачёвни ағдариш», — дея қайд этган Назарбоев.
Аввалроқ Назарбоев дунёга таҳдид солаётган хавф ҳақида маълумот берганди. Шунингдек, Қозоғистондаги чегара бўлимининг номи Назарбоев шарафига ўзгартирилгани хабар қилинган.