Қибрай тумани ҳокими Миркасимов Мираъзам Миразадовичнинг туманда фаолият кўрсатаётган тадбиркорларга йўллаган
МУРОЖААТИ
Ҳурматли Қибрай туманининг фидойи ва меҳнаткаш тадбиркорлари!
Мамлакатимизда тадбиркорлик ва кичик бизнесни ривожлантириш бугунги кунда давлат сиёсатининг энг устувор йўналишларидан бири ҳисобланади.
Тадбиркорларни қўллаб-қувватлаш ва соғлом бизнес муҳитини яратиш бўйича амалга оширилаётган туб ислоҳотлар натижасида, Жаҳон банкининг «Бизнес юритиш – 2020» ҳисоботида Ўзбекистон 7 поғонага кўтарилиб, 69-ўринни эгаллади ва дунёнинг энг яхши 20 та ислоҳотчи давлати қаторидан жой олди. Янги корхона очиш қулайлиги бўйича юртимиз илк бор дунёда саккизинчи ўринга кўтарилди.
Ушбу ютуқлар тадбиркорларни қўллаб-қувватлаш ва бизнес муҳитини яхшилаш борасида ҳукуматимиз томонидан олиб борилаётган оқилона сиёсатни ҳамда сўзсиз Сиз каби ўз ватанининг фидойи ва меҳнаткаш тадбиркорларининг саъй-ҳаракатлари самарасидир.
Сўнги йилларда ҳукумат томонидан тадбиркорликни ривожлантириш бўйича қабул қилинган бир қатор қарорлар натижасида туманимизда ҳам тадбиркорлик учун қулай ишбилармонлик муҳити яратилди дейиш мумкин.
Хусусан, “Оилавий тадбиркорлик”ни ривожлантириш мақсадида тумандаги тижорат банклари томонидан юридик ва жисмоний шахсларга қарийб 21,0 млрд сўм имтиёзли кредит маблағлари ажратилди.
Тадбиркорлик субъектларига бўш ер майдони ва бинолар ажратишнинг шаффоф механизмларини жорий этилиши натижасида, жами 10,8 гектар бўлган 46 та бўш ер участкалари ва 12 та бўш бино иншоотлар е-аукцион веб сайти орқали савдога чиқарилди.
Ўз ҳудудида қурилишни амалга ошириш ишларини туман ҳокимининг қарорисиз давлат хизматлари агентлиги орқали ваколатли органлар рухсати билан амалга ошириш амалиёти жорий этилди.
Бундан ташқари, Юртбошимизнинг фармонлари билан Ўзбекистон Республикаси Бош вазирининг “Тадбиркорлар мурожаатларини кўриб чиқиш қабулхонаси” ташкил қилиниши ҳам тадбиркорларнинг муаммоларини тезкор равишда ҳал этишга кенг имкониятлар очиб берди.
Жорий йилда тадбиркорликни ривожлантириш бўйича олиб борилган ислоҳотлар келгусида ҳам жадал давом эттирилади.
Жумладан, туманимизда етиштирилган мева-сабзавот, узум, лимон ва полиз маҳсулотларини ички истеъмол ва пойтахтликлар эҳтиёжини таъминлашдан ташқари кенг ҳажмда экспортга йўналтириш имконияти ҳам мавжуд. Буларга чорвачилик, паррандачилик ва балиқчилик соҳаларини ҳам қўшиш мумкин. Туманда етиштирилган қишлоқ хўжалиги маҳсулотларини қайта ишлаш орқали саноатни ҳам жадал ривожлантириш имкониятларига эгамиз.
Шу нуқтаи назардан келиб чиққан ҳолда, 2019-2020 йилларда туманда мева-сабзавотчиликни ривожлантириш, қишлоқ хўжалиги соҳасида кооперация тамойилларига асосланган муносабатларни жорий этиш устида иш олиб борилмоқда.
Эски ва самарасиз боғлар ўрнига замонавий интенсив боғлар ташкил этиш, қишлоқ хўжалигида қўшилган қиймат занжирини яратиш мақсадида мева-сабзавотчилик ва лимончилик кластерлари ҳамда қишлоқ хўжалиги соҳасида кооперация тизимини жорий этиш мақсад қилинган.
Экспортбоп ва импорт ўрнини босадиган маҳсулотлар ишлаб чиқаришни кенгайтириш, мавжуд хом-ашё ва имкониятлардан самарали фойдаланган ҳолда, маҳаллийлаштириш даражасини чуқурлаштириш туманда саноатни ривожлантиришнинг негизи бўлиши керак.
Шу каби ислоҳотларни амалга оширишдаги муҳим бўғин, шубҳасиз
- тадбиркорлик субъектлари ҳисобланади. Шу сабабли, мамлакатимизда яратилаётган барча шароитлар тадбиркорлар учун бўлиши керак.
Шуни чуқур англаган ҳолда, мен Қибрай тумани ҳокими сифатида, Сиз тадбиркорларга қўлимдан келган ёрдамни аямасдан, қулай тадбиркорлик муҳити яратиб беришга ҳаракат қиламан. Тадбиркорлик ва кичик бизнесни ривожланишига камарбаста бўлиш, соҳада ислоҳотларни бекаму кўст амалга оширишни ўз хизмат вазифам ва бурчим деб биламан.
Ўзим ва бошқа секторлар раҳбарлари билан бирга жойларга чиққан ҳолда муаммоларни ҳал этиш тадбиркорликни ривожлантириш бўйича ишларни самарали ташкил этишни йўлга қўямиз.
Тадбиркорларга тегишли барча масалалар Қибрай тумани ҳокимлиги, Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхонаси, Савдо-саноат палатаси Қибрай тумани бўлинмаси, Тадбиркорлар касаба уюшмаси ва банкларнинг ўзаро ҳамкорлигида ечилиши назоратга олинади. Қолаверса, ҳудуддаги барча раҳбарлар, тадбиркорларнинг яқин кўмакчисига айланишини, доимий равишда тадбиркорлар билан ҳамнафас бўлишини таъминлаймиз.
Эндиликда Сиз ўзингизни қийнаган масалалар бўйича туман ҳокимлигининг “Facebook” ижтимоий тармоғидаги “Qibray tumani hokimligi” аккаунти ҳамда “Qibray.uz” веб сайти орқали исталган пайтда мурожаат йўллашингиз мумкин.
Ҳурматли тадбиркорлар ҳамда тадбиркор бўлиш истагида бўлган фуқаролар!
Туманимизнинг географик жиҳатдан ўта қулай жойлашуви, унумдор ерлари ва қулай иқлим шароитлари тадбиркорлик фаолиятини йўлга қўйиш учун айни муддао ҳисобланади. Юқорида келтирилган йўналиш ва фикрларни инобатга олган ҳолда, Сизларни ташаббускорлик ва шижоат билан тадбиркорликни ривожлантиришга чақираман. Зеро, биз “Ҳалол тадбиркор - замонамиз қаҳрамони” деган иборанинг моҳиятини англаб етдик.
Сизларнинг саъй-ҳаракатларингиз бугунги кундаги энг олий мақсадларимиздан бири ҳисобланган янги иш ўринлари яратилишига ва меҳнатсевар ҳалқимизнинг иш банд бўлмаган қатламини иш билан таъминланишига хизмат қилади. Сизларнинг куч-қудрат ва салоҳиятингиз Қибрай туманини янада гуллаб-яшнашига катта ҳисса қўшишига ишонаман.
Ҳурмат билан,
Мираъзам Миркасимов
Қибрай тумани ҳокими