2020 йил пахта ҳосили учун Сурхондарёда жаҳон бозорида катта талабга эга ғўза навларини экиш режалаштирилмоқда
Surxondaryo viloyati hokimligi matbuot xizmati
Сурхондарё вилояти ҳокимлигида қишлоқ хўжалиги масалаларига бағишланган йиғилиш бўлиб ўтди. Вилоят ҳокими Тўра Боболов бошқариб борган йиғилишда туманлар ҳокимлари ҳамда кун тартибидаги масалаларга тегишли мутасадди раҳбарлар иштирок этди.
Таъкидланганидек, вилоятимиз қишлоқ хўжалиги бўйича улкан салоҳиятга эга. Бозорларимиз тўкин, халқимиз ризқи мўл-кўл бўлишидан тортиб экспортдан қўшимча даромад топишгача бўлган жуда кўп масалалар қишлоқ хўжалиги тармоғи билан боғлиқ.
Шу боис 2020 йилги қишлоқ хўжалиги экинларини экиш мавсумига тайёргарлик кўриш мақсадида ҳозирдан аниқ режаларнинг белгилаб олиниши ва ишнинг самарали ташкил этилиши эртанги муваффақиятларимизга асос бўлиб хизмат қилади.
Йиғилишда пахта хом ашёсини етиштиришда жорий йилда эришилган натижалар, йўл қўйилган хато-камчиликлар танқидий таҳлил қилинди.
2020 йил пахта ҳосили учун ҳудудларнинг тупроқ-иқлим шароитларини ҳисобга олган ҳолда, ғўзанинг тезпишар ва серҳосил селекцион навларини оқилона жойлаштириш, бўлғуси чигит экиш ишларининг комплекс тадбирларини ўз вақтида ташкил этишни таъминлаш юзасидан ташкилий чора-тадбирлар белгилаб олинди.
Мўл ҳосил етиштиришнинг асосий омилларидан бири навни тўғри танлашдир. 2020 йилда Сурхондарёда 74 минг гектардан ошиқ ер майдонига пахта экиш режалаштирилган. Йиллар давомида орттирилган тажрибага биноан деҳқонларимиз келгуси йил вилоятимиз жанубий туманларининг 40 минг гектар ғўза майдонига ингичка толали, шимолий туманларнинг 34 мингдан ортиқ ер майдонига ўрта толали ғўза навларини экишни режалаштирмоқда.
Тола сифати ва ҳосилдорлиги юқори, эртапишар, касаллик ва зараркунанда ҳашаротларга чидамли, табиатнинг турли ноқулайликларига бардошли “Сурхон-14”, “Сурхон-16”, “Сурхон-103”, “Термиз-202”, Термиз-208” каби ингичка толали, шунингдек, ҳосилдорлиги, тола чиқимининг юқорилиги билан ажралиб турадиган “Бухоро-102”, “Султон”, “Бешқаҳрамон”, “Наманган-77”, “Порлоқ-1” сингари ўрта толали бу ғўза навлари фермерларга қўшимча даромад олиш имконини беради.
