Вилоят прокуратураси ижтимоий тармоқда тарқалган хабар юзасидан расмий муносабат билдирди

Вилоят прокуратураси ижтимоий тармоқда тарқалган хабар юзасидан расмий муносабат билдирди

Surxondaryo viloyati hokimligi matbuot xizmati

Сурхондарё вилояти, Қумқўрғон туманида кўприк қулаганлиги тўғрисида ижтимоий тармоқда тарқалган хабар юзасидан вилоят прокуратураси расмий муносабат билдирди.

“Қумқўрғон тумани ҳудудидан ўтувчи, давлат аҳамиятидаги 4р-105 “Дарбанд-Бойсун-Элбаён” автомобиль йўлининг 76 километрида жойлашган, узунлиги 66 погонаметр бўлган “Полвонтош” селгаси устидаги кўприкнинг оралиқ таянч устунлари 1 метрга чўкиши ва устки плиталари қулаши натижасида кўприк яроқсиз ҳолатга келиб, ҳозирги кунда пиёдалар ва автомашиналар ҳаракати чекланган.

Мазкур ҳолат юзасидан “Сурхон қурулиш назорат ўлчов” МЧЖ ва вилоят автомобиль йўллари ҳудудий бош бошқармаси мутахассислари томонидан расмийлаштирилган далолатномага кўра, ўтказилган назорат ўлчовида пудратчи корхона томонидан ҳақиқатда бажарилган ишлар “Бажарилган ишларни тасдиқловчи счёт-фактура маълумотномаси” (Форма-3)га қўшиб ёзиш ҳолатлари аниқланмаган.

Лойиҳа смета ҳужжатларига нисбатан бажарилмаган ишлар ҳажми 34 млн. 491 минг 265 сўмни ташкил қилишини ва мавжуд пудратчи ва буюртмачи ўртасида имзоланган 21.04.2014 йилдаги 3/ТО-2014-сонли шартноманинг 3-қисми (пудратчининг мажбуриятлари) 4-банди пудратчи томонидан тўлиқ бажарилмаганлиги кўрсатилган.

Ўзбекистон Республикаси Президентининг 14.03.2020 йилдаги “Коронавирус пандемияси ва глобал инқироз ҳолатларининг иқтисодиёт тармоқларига салбий таъсирини юмшатиш бўйича биринчи навбатдаги чора-тадбирлар тўғрисида”ги ПФ-5969-сонли Фармони ижросини таъминлаш ҳамда 17.03.2020 йилдаги Ўзбекистон Республикасига коронавируснинг кириб келиши ва тарқалиши олдини олиш юзасидан чора-тадбирлар Дастурини тайёрлаш бўйича Республика Махсус комиссиясининг 01-14/1-234-рақамли 6-сонли йиғилиш баёнида “Санитария қоидалари, нормалари ва гигиена нормативларига қатъий риоя этилишини таъминлаш” мақсадида омма ўртасида коронавирус касаллиги тарқалиб кетишини олдини олиш учун карантин эълон қилиниб, шахслар билан мулоқат қилиш вақтинчалик тўхтатилганлиги сабабли ҳар қандай тергов ҳаракатларини ўтказишнинг имкони йўқлиги, мазкур ҳолатни ойдинлаштириш учун бошқа шахслардан ва мутахассислардан хулоса олиш имконияти мавжуд бўлмаган.

Шу сабабли, 18.06.2020 йилда Термиз транспорт прокуратураси томонидан Ўзбекистон Республикаси ЖПКнинг 83-моддаси 2-бандига асосан жиноят иши қўзғатишни рад этиш ҳақида қарор қабул қилинган.

Ушбу қарор 29.09.2020 йилда Транспорт прокурори томонидан бекор қилиниб, ҳозирги кунда терговга қадар текширув ҳаракатлари олиб борилмоқда”, — дейилади расмий муносабатда.