palata
@notary- – Турмушга беришган, бахтим бўлмаган. Ажрашиб, ойимникига қайтиб келганман. Ҳомиладор эдим. Қизим дунёга келди. Шу-шу бошқа турмуш қилмадим. Шу қизим ҳозир Тошкент давлат тиббиёт олийгоҳида ўқияпти. Ойим раҳматлик мендан кейин хор бўлмагин, деб 2 хонали уй олиб берганди. Ҳозир қаттиқ касал бўлиб қолдилар. Операция қилдириш керак, чет давлатда, жуда қиммат операция экан...Шу жойида аччиқ-аччиқ йиғлаб олди, стаканга сув қуйиб узатдим. У бир ҳўплаб стаканни столга қўйди-да, яна гапини давом эттирди: - Шу десангиз, опажон, эримдан ажрашишга ажрашибману, шуни расмийлаштириб қўймаган эканман. Энди уйимни сотиб, ойимни даволатай десам, 30 йилдан буён куришмаган собиқ эримдан рухсат керак экан. Уни қаердан топаман, кейин кўнадими йўқми? Шунга бирор маслаҳат берсангиз?
- Авваломбор, йиғламанг, - дедим мен уни юпатишга ҳаракат қилиб. – Унақа қийин иш эмас муаммонгиз. Фақат судга мурожаат қилиб, собиқ турмуш ўртоғингиз билан ажрашиб кетганлигингиз, 30 йилдан буён яшамаслигингиз ва мулк фақат сизга шахсан тегишли эканлиги фактини тасдиқлатиб оласиз. Кейин уйни бемалол сотсангиз бўлади. Аёл қабулга киргандан то чиқиб кетгунга қадар йиғлашдан тўхтамас эди.
Аёлнинг абгор кўринишига, эзгин чеҳрасига қараб кўнглим бузилди. Қўлига қўярда-қўймай озгина пул бердим, судга қатнаганингизда йўлкира қиларсиз, деб. У дуо қила-қила чиқиб кетди.
Орадан 1 ойлар чамаси ўтди, эрталаб ишга келсам, ўша аёл кутиб турибди. Худди яқин кишисини кўргандек суюниб, қучоқлаб кўришди.
- Яратганга шукур, муаммо ҳал бўлиб, уйимни сотиб олдим, - деди у яна йиғидан қалтираган товушда. – Ҳаммаси сизнинг тўғри маслаҳатингиз туфайли бўлди. Ўшанда сизнинг айтганингизни қилиб, судга ариза ёздим, барча керакли ҳужжатларни тақдим қилдим. Суд турмуш ўртоғим билан 30 йилдан бери яшамаслигим ва уйни менинг шахсий мулким хақидаги фактини тасдиқлаб берди. Уйни сотдим. Самолётга чипта ҳам сотиб олдим, ойимни даволатишга олиб кетяпман.
- Юрганимдаям турганимдаям сизни дуо қиляпман, атай раҳмат айтишга келдим...Аёл яна йиғлаб юборди.
- Энди йиғламангда, Аллоҳ насиб, онангиз ҳам яхши бўлиб кетса, кўрмагандек бўлиб кетасиз, - дея овутиб, кузатиб қўйдим. Кўнглим қуёш нури тушгандек ёришди. Яхшилик барибир яхшида...
Зуҳра Мусаева,
Нотариал палатанинг нотариат бўлими бошлиғи