Медитация

Медитация

Loser Man

Бірде көше жақтағы ішетін жігіттер жиналып алып, ахаңды тартып отырған едік. Әртүрлі әңгіме айтылып, әр қилы тақырыптар қозғалды. Елдің экономикасы, саясат, ЭКСПО - ны жамандаудан бастап, кешегі Қуаныштың баласының тойына дейін сөз етілді. 

- Еее, жігіттер, - деді кенет Аманжан бір рөмкені тартып жіберіп, бетін тыржитып, - Той демекші, білесіңдер ма, біздің әлемнен бөлек параллельді әлем деген де болады екен, онда бұл әлемдегі құбылыстардың бәрі керісінше жүреді дейді. Сонда тап болсақ иә... 

 Тойдың параллельді әлемге не қатысы бар деп басымды ауыртып отырғанда, Бақытжан көршім шыдамай:

- Ее, қойш миды ашытпай! Кеттім үйге, мынаның қасында отырмайм! - деп әртүрлі "мәдениетті" сөздерден жіберіп, тұрып кете барды. 

- Мынаның шаригі қайта кете бастады, - деп жігіттер де бірінен соң бірі тарай бастады. 

- Параллельді әлемі құрсын, бала туып жататын жағдайым жоқ! - деп кеше ғана әйелі босанған Серікбай да үйіне қарай тайып тұрды. 

 Аманжанның мұндай қиялилығы бекер емес-тін. Мектепті үздік, ЖОО-ны физика мамандығы бойынша қызылға бітірген бұл танысы болмай жұмыс таппай сенделіп, ақыры ішіп кеткен бейбақ болатын. 

 Жаңағы Аманжанның айтқандары басқалар үшін абсурд көрінгенмен, мені ойландырып тастады. Үйге жеткенше терең ойға батып, жете сала интернетке шықтым. Рефлекспен басында 18+ сайттарға кіріп кетіп, кейін негізгі мақсат параллельді әлем туралы іздей бастадым.

Іздеп отырып "параллельді әлемге медитация арқылы тап болуға болады" дегенді көзім шалды. Медитация мағынасының "тазару" екенін біліп душқа түсіп жүрсем, бұл жерде әңгіме жан дүниені, ойды тазарту туралы екен. 

Қызығушылық дейміз бе, жаңалық ашуға құмарлық па, әлде мендегі адамзаттың миллиондаған жылдар бойы өзі тіршілік еткен жерін қорғап, аялаудың орнына тастап қашқалы тұратын инстикті ма, әйтеуір мен сол қиялидың сөзіне сеніп, басқа әлемге тап болуға қатты құмарттым. 

 Йога әдісіндегідей поза жасап, терең бір демалдым да, күнделікті проблемдарды, бәрін - бәрін ұмытып, тапжылмай отыра қалдым. Алғашқыда кешегі маса шаққан жерлер мен мұрынның керек емес кезде қышитін әдетінен бесінші кеңістікке аттанбақ түгілі қозғалмай отыру қиынға түсті. Сенімге күдік ұялап, параллельді әлемнің бар екеніне күмән келтіре бастаған едім, сол әлемнің құдайы өзінің бар екенін сездіріп мені белгісіз бір мекенге лақтырды да тастады: көз алдыма кезінде құлша жұмсаған атамның бейнесі пайда болды да, кенет жарқ етті. Көзімді ашсам бір ғимараттың қараңғы бұрышында жаңа туған сәбидей қоқыс жәшігінде жатыр екем. Үсті-басымды бір қағып жіберіп, қапастан адамдардың әрлі-берлі өткен сұлбаларына, белгісіз бір өркениетке қарай беттедім. Алдымда үлкен жаңалық тұр! Жаңа заңдар мен жаңа қоғам, өзге табиғат, мұрны бет, қолы бұт, басы көт адамдарды көріп - білуге асығып келе жатырмын...  (жалғасы бар)