На вадзе ці на кефіры: халаднік-батл на летнюю спёку

У маім дзяцінстве класічным варыянтам халадніку быў той, што на вадзе. Яго гатавалі ў вялікім рондалі і можна было цягам дня ўліць сабе місачку і пасёрбаць з задавальненнем. Зараз ўсё больш набывае папулярнасць халаднік на кефіры. Што выбраць на спякотны летні час? Абодва варыянты! Цёця Іра дазваляе. Бо выхадных таксама два.

Што трэба мець у запасе для халадніка

Буракі – вараныя ці марынаваныя, 30 – 50 г.*

Агуркі – 1 шт. (невялікі)

Яйкі – 1 шт.

Цыбуля  - некалькі зялёных пер’яў

Укроп – некалькі галінак

 Для халадніка на вадзе – ахалоджаная кіпячоная вада -  200 мл., 1 сталовая лыжка смятаны, соль па смаку, па жаданні – трохі воцату.

Для халадніка на кефіры – кефір – 200 мл., па жаданні - соль.

*- прыкладная колькасць прадуктаў з разліку на 1 порцыю.

Што як робім - асаблівасці і фішкі

Набор прадуктаў для абодвух халаднікоў амаль цалкам супадае. Розніца ў тым, што складае аснову і яшчэ ў тым, якія будзем выбіраць буракі. Для халадніка на вадзе часцей бралі вараныя, а ў гатовы суп дадавалі лыжку воцату для смаку. Варыянт з марынаванымі таксама ок - справа густу.

Халаднік на кефіры звычайна гатуюць з марынаванымі буракамі, але ніхто не забароніць выкарыстаць у ім проста вараныя.

Усе складнікі трэба пакрышыць кубікамі. Цыбулю для халадніка на вадзе у нас дома пераціралі з соллю драўляным таўкачыкам. Калі хто яшчэ мае такую прыладу – раю скарыстацца лайфхакам.

Пытанне, як крышыць яйкі таксама залежыць ад сітуацыі. У нас дома іх крышылі дробна. Калі халаднік гатуецца порцыямі, то часцей яйка проста рэжуць надвое.

Вось і амаль гатовыя халаднікі. Засталося перамяшаць і падаваць на стол.

З чым падаць халаднік

Да халадніка на вадзе звычайна падаюць хлеб.

Халадніка на кефіры дапаўняюць варанай і абсмажанай на алеі бульбай.

Які б варыянт вы сёння не выбралі –

Смачна есці!