【記香港理工大學保衛戰】

繼中大保衛戰後，理工大學亦成為香港人嘅革命戰場。周同學於2019年11月8日逝世，觸發連日嘅「黎明行動」，目標就係要癱瘓全港，強制三罷。理工大學與紅磡海底隧道出口相鄰，順應住地理優勢，抗爭者自11月13日起利用理大作為據點，並喺紅隧出口堵路、焚燒收費亭。癱瘓紅隧亦意味癱瘓港九往來交通癱瘓，而最終整場理大戰役亦令紅隧停止運作接近兩星期。

為咗打擊理大連帶紅隧嘅據點，香港警察喺17日下午封鎖所有出口，圍堵理大，不准其他市民接近校園，並禁止所有身處校園内人士包括醫護人員離開，目的就係令抗爭者失去外界支援，意圖一網打盡。同時，警察已部署飛虎隊以狙擊槍瞄準理大校園。

同日晚上連登、telegram各頻道等號召九龍區開花，寄望反包圍行動可以迎救圍困手足。在外手足各盡其責，包括運送物資、開車堵路、義載接送、籌謀逃走路線，同時亦喺彌敦道、尖沙咀一帶同警察正面衝突，無非係為理大內嘅手足製造機會，等佢哋可以突破重圍。可惜事與願違，不論理大內嘅抗爭者，以及前去迎救嘅手足，突圍行動最終未竟全功。

18日凌晨，裝甲車不斷沿暢運道天橋向理大強攻，警察一度威脅如果抗爭者繼續反抗，將會使用實彈射擊；手足無懼恐嚇，以無數汽油彈反擊，甚至將裝甲車燒至報廢吊走。

被困理大嘅手足利用多種途徑逃離理大，抗爭者跑過暢運道、漆咸道南等高速公路離開；爬過重重鐵絲網經火車軌離開；伏於草叢、明渠等待時機登上私家車；於橋上游繩而下，再由電單車隊接走；甚至經污水渠爬數百米至其他地區離開。

是役共一千三百七十七位抗爭者被政權逮捕，三百一八位未成年抗爭者被記錄個人資料，正面臨香港政權清算。

正因為社會及抗爭者間對理大一役誤解甚多，又或被敵人利用輿論機器污蔑義士之義舉，所以更有正名、肯定理大保衛戰之必要。革命本質就係用武力推翻政權，理大一役手足以身作則，負隅頑抗，向大眾傳播「非武力無以救香港」嘅正確信息。手足為革命正名，供往後香港人仿效，義舉值得我哋香港人尊敬。其次，理大保衛戰加快本來喺參眾兩院膠著嘅審議過程[1][2]，《香港人權與民主法案》快速通過，理大手足居功至偉。

敵人嘅抹黑唔能夠玷污手足嘅義舉，戀戰只係敵人虛構出嚟嘅罪名。有手足為咗殿後，等其他有需要嘅人先離開先被困；有手足受傷，根本無法離開。堅守據點之戰術或有商榷餘地，教訓亦可供前線手足借鑒，惟理大一役盡顯香港民族內各員守望相助，堅毅不屈的信念，此役絕對喺香港脫中獨立嘅歷史上佔一席位。

三個月過去，好多人批評呢場係有勇無謀、註定失敗嘅陣地戰，甚至指責理大手足令營救嘅人被捕受傷——任何犧牲都有佢嘅歷史意義，需要我哋去賦予同廣傳。理大內外手足犧牲，鍊成嘅就係我哋嘅民族內涵。唔明白民族大義嘅人，只會對理大保衛戰冷嘲熱諷，事後孔明，搭緊立國路上嘅順風車而不自知；能夠分享民族成員間嘅情感嘅人，憂戚與共，就會將犧牲轉化為意義。我哋一定唔可以忘記當初營救嘅目的：香港人唔會留低任何一位手足喺戰場。即使最終功敗垂成，過十萬計嘅手足用行動證明咗呢個精神。只要我哋肯為香港民族革命志業奉獻犧牲，香港民族亦終不辜負我哋。

謹以拙文向參與理工大學保衛戰以及營救行動嘅手足致以最高敬意。

[1]：美國參議院於14日深夜啟動「熱線」方式《香港人權與民主法案》，以求迅速通過。法案最終於18日通過，總統特朗普於27日簽署後隨即生效。

[2]：共和黨參議員霍利（Josh Hawley）在議案審議發言時，特別向現時被困於香港理工大學的示威者所做的事情感動美國參議院。