Давлатимиз раҳбарининг Тинчлик кенгаши таъсис йиғилишидаги нутқи мамлакатимиз ташқи сиёсатининг тинчликпарвар ва гуманистик моҳиятини яққол намоён этди 

Фракция йиғилишида давлатимиз раҳбарининг АҚШга амалий ташрифи ҳамда Тинчлик кенгашининг биринчи саммитидаги нутқида илгари сурилган ташаббуслар хақида ҳам сўз юритилди. 

Қайд этилганидек, Вашингтон шаҳрида бўлиб ўтган Тинчлик кенгашининг тарихий таъсис йиғилиши Ўзбекистон ташқи сиёсатининг тинчликпарвар ва гуманистик моҳиятини яққол намоён этди. Шавкат Мирзиёевнинг ушбу халқаро платформада фаол иштирок этиши мамлакатимизнинг глобал хавфсизлик, инсонпарварлик ва низоларни тинч йўл билан ҳал этиш борасидаги қатъий позициясини тасдиқлади. Давлатимиз раҳбари томонидан Ғазо секторидаги тикланиш жараёнларига оид илгари сурилган ёндашув суверенитетга ҳурмат ва маҳаллий аҳолининг манфаатларини устувор қўйиш тамойилларига асосланади.

Ташриф доирасидаги иқтисодий мулоқотлар ҳам мазмунли ва амалий натижаларга бой бўлди. АҚШ Президенти Дональд Трамп раислигида ўтган тадбирлар, шунингдек, савдо ва инвестиция соҳасидаги учрашувлар икки томонлама ҳамкорликнинг мустаҳкам пойдеворга эга эканини кўрсатди. Товар айланмасининг 1 миллиард доллардан ошиб бориши, ЖСТга аъзо бўлиш жараёнини қўллаб-қувватлаш ва ТИФА доирасидаги ҳамкорлик Ўзбекистон иқтисодиётини жаҳон бозорига чуқур интеграция қилишга хизмат қилмоқда.

Фракция аъзолари Вашингтондаги сиёсий ва иқтисодий мулоқотлар, шунингдек, Тинчлик кенгаши доирасида илгари сурилган ташаббуслар Ўзбекистон ташқи сиёсатининг яхлит, изчил ва узоқ муддатли стратегияга асосланганини яна бир бор қайд этишди. Мамлакатимизнинг тинчлик, барқарорлик ва тараққиёт йўлидаги фаол иштироки унинг халқаро майдондаги обрў-эътиборини янада юксалтираётганини таъкидлашди.