#eth

#eth


የፌዴራሉ መጀመሪያ ደረጃ ፍርድ ቤት ከባለስልጣናት ግድያ ጋር በተያያዘ ጋዜጠኛ ኤልያስ ገብሩን ጨምሮ በሽብር ወንጀል የተጠረጠሩ ሰባት ሰዎች ላይ ፖሊስ የጠየቀውን ተጨማሪ የ28 ቀናት የምርመራ ጊዜ ፈቀደ።

በአዲስ አበባና ባሕርዳር ከተሞች ሰኔ 15 ቀን 2011 ዓ.ም ከተፈፀመው የባለስልጣናት ግድያ ጋር በተያያዘ በቁጥጥር ስር የዋሉት ተጠርጣሪዎች ዛሬ በፌዴራሉ መጀመሪያ ደረጃ ፍርድ ቤት አራዳ ምድብ 2ኛ ወንጀል ችሎት ቀርበዋል።

ፖሊስ በተጠርጣሪዎቹ ላይ በጠየቀው ተጨማሪ የ28 ቀናት የምርመራ ጊዜ ላይም ክርክር ተካሂዷል።

ተጠርጣሪዎቹ በቁጥጥር ስር የዋሉት ከመንግስት ባለስልጣናት ግድያ ጋር በተያያዘ በሽብር ወንጀል ተሳትፈዋል በሚል ነው።

ፖሊስ ወንጀሉን ለማጣራት በተሰጠው ጊዜ አንድ ቡድን ወደ ባሕርዳር መላኩን፣ ከብሔራዊ መረጃ ደህንነትና ከሌሎች መስሪያ ቤቶች ጋር በመሆንም ወንጀሉን እያጣራ እንደሆነ አስታውቋል።

ቀሪ የሰውና የሰነድ ማስረጃውን ለማደራጀት ተጨማሪ የምርመራ ጊዜ እንደሚያስፈልገው በመግለጽ።

ተጠርጣሪዎቹ በጠበቆቻቸውና ራሳቸውም ለፍርድ ቤቱ እንዳቀረቡት በአሁኑ ወቅት መንግስት ትክክል እንዳልሆነ አምኖ ይቅርታ በጠየቀበት የፀረ ሽብር አዋጅ ተጠያቂ ልንሆን አይገባም ነው የሚሉት።

ተጠርጣሪው አቶ ኤልያስ ገብሩ ጋዜጠኛ፣ የሰብዓዊ መብት ተሟጋችና የባልደራስ ባለአደራ ኮሚቴ አባል ነኝ እንጂ በሽብር ወንጀል የሚያስከስሰኝ ወንጀል አልፈፀምኩም ብሏል።

ፖሊስ የጠየቀው ተጨማሪ የምርመራ ጊዜ አግባብነት የሌለው በመሆኑ ጉዳዬን በውጭ ሆኜ እንድከታተል ፍርድ ቤቱ የዋስትና መብቴን ይፍቀድልኝ ሲልም ጠይቋል።

ሌላዋ ተጠርጣሪ የብርጋዴር ጄኔራል አሳምነው ጽጌ ባለቤት ወይዘሮ ደስታ አሰፋ ጠበቆችም ደንበኛችን የሟች ሚስት በመሆናቸው ብቻ በቁጥጥር ስር ሊውሉ አይገባም ብለዋል።

ከተጠርጣሪዋ ቤት ተገኘ የተባለው መሳሪያና ጥይት መንግስት ለሟች ብርጋዴር ጄኔራል አሳምነው ጽጌ በሕጋዊ መንገድ የሰጣቸው በመሆኑ ፍርድ ቤቱ ይህን ተገንዝቦ ወይዘሮ ደስታን በነፃ እንዲያሰናብት ወይም የዋስትና መብት እንዲሰጣቸውም ጠይቀዋል።

ፖሊስ በበኩሉ ”ተጠርጣሪዎቹን በቁጥጥር ስር ያዋልኩት ሊያስጠረጥራቸው የሚችል መረጃ ስላለኝ ነው” ብሏል።

ጉዳዩ ውስብስብና አስቸጋሪ በመሆኑም ከተለያዩ አካላት ጋር በመሆን የማጣራትና የመመርመር ስራ እየተካሔደ መሆኑን ገልጾ ተጨማሪ ጊዜ እንዲሰጠው ጠይቋል።

የግራ ቀኙን ክርክር ያደመጠው ፍርድ ቤቱ የፀረ ሽብር አዋጁ እስከ አራት ወር የሚደርስ የምርመራ ጊዜ የሚፈቅድ መሆኑን በመግለጽ ፖሊስ የጠየቀውን የ28 ቀን ተጨማሪ የምርመራ ጊዜ ፈቅዷል።

ፖሊስ ምርመራውን አጠናቆ ለመስከረም 22 ቀን 2012 ዓ.ም እንዲያቀርብም ትዕዛዝ ሰጥቷል።

#ENA