«e-mail»сиз муваффақият

Бир киши «Microsoft» компаниясига ҳовли тозаловчи бўлиб ишга кирмоқчи бўлибди.

– Табриклаймиз, сиз қабул қилиндингиз. Марҳамат қилиб, e-mail қолдирсангиз – биз иш жадвали ҳақида хабар қиламиз.

– Менда ҳатто компьютер йўқ, – тан олибди ҳалиги киши, – e-mail нималигини эса умуман тушунмайман.

– Афсуски, у ҳолда сизни иш билан таъминлай олмаймиз. Сиз виртуал жиҳатдан мавжуд эмассиз, «Microsoft»нинг барча ходимлари билан тезкор алоқа эса – компаниямизнинг бош масаласи ҳисобланади.

Наилож, нима ҳам қила оларди... Умидсиз кайфиятда компания биносидан чиққан киши қандай пул топиш ҳақида бош қотира бошлабди. Чўнтагида 30 доллар пули бор. У деҳқондан 10 килограмм олма харид қилибди ва кўчага олиб чиқиб сотибди. Бир неча соат ичида унинг маблағи икки баравар, 6 соатдан сўнг эса 10 баравар ортибди. Шунда у бундай саъй-ҳаракат билан иш берувчисиз ҳам яшай олишини тушуниб етибди.

Вақт ўтиб, у киши кичик растада савдо қила бошлабди, кейинчалик мўжаз дўкон очиб, беш йилдан сўнг йирик супермаркетлар эгасига айланибди. Бир куни у ўз бизнесини суғурта қилиш мақсадида тегишли манзилга келибди, ходим ундан e-mail қолдиришини сўрабди. Бизнинг ишбилармон эса, худди бир неча йил аввалгидек, e-mail очмаганини, ҳатто компьютери ҳам йўқлигини айтибди.

– Қизиқ. Шундай катта бизнесменнинг e-mail ва компьютери бўлмаса?! Агар улар бўлганда, нималарга эриша олардингиз, биласизми?

– Биламан, «Microsoft» компаниясининг ҳовли тозаловчиси бўлардим...

P.S: Агар бирон нарсанг бўлмаса, ўйлаб кўр, балки унинг сенга умуман кераги йўқдир. Инсон учун энг муҳими шижоат, саъй-ҳаракат ва ўзига ишонч. Чин дилдан истасанг, қўлда ҳеч нарса бўлмаса ҳам кўп нарсаларга эришиш мумкин. Асосийси, бир жойда туриб қолмаслик ва мақсад сари интилиш зарур!

Гулчеҳра АЗИМОВА тайёрлади.