MUNOSABAT

Prezidentimiz Shavkat Mirziyoyev raisligida o‘tkazilgan videoselektor yig‘ilishida aholi murojaatlari bilan ishlash masalasi muhokama qilindi. Bu masala bejizga kun tartibiga chiqayotgani yo‘q. Chunki odamlarning dardi, muammosi eshitilsa va o‘z vaqtida hal qilinsa, jamiyatda ishonch ham, barqarorlik ham mustahkam bo‘ladi.

So‘nggi yillarda bu borada katta ishlar qilindi. Jumladan, O‘zbekiston Respublikasi Prezidentining Xalq qabulxonasi va Prezident Virtual qabulxonasi tashkil etilgani odamlar uchun qulay imkoniyat yaratdi. Endi har bir fuqaro o‘z muammosini bemalol aytishi, yordam so‘rashi mumkin. Bu tizim davlat idoralarini xalqqa yanada yaqinlashtirdi.

Ammo yig‘ilishda aytilganidek, ayrim joylarda muammolar hali ham to‘liq hal bo‘lmayapti. Ba’zi rahbarlar murojaatlarga yuzaki qarab, faqat rasmiy javob berish bilan cheklanib qolayotgani tanqid qilindi. Natijada odamlar bir masala bo‘yicha bir necha bor murojaat qilishga majbur bo‘layapti. Bu esa fuqarolarni norozi qiladi.

Shu bois davlat rahbari murojaatlar bilan ishlash tizimini yanada yaxshilash kerakligini ta’kidladi. Har bir rahbar “har bir inson va xonadon muammosini bilish va vaqtida yordam berish” tamoyili asosida ishlashi zarurligi qayd etildi. Chunki xalqning dardini eshitish va unga yechim topish – rahbarning eng muhim vazifasidir.

Yig‘ilishda yana bir muhim fikr aytildi: muammoni faqat bartaraf etish bilan cheklanib qolmasdan, uning sababini ham aniqlash kerak. Agar muammoning ildizi topilsa, bunday holatlar kelajakda yana takrorlanmaydi. Bu esa tizimli ishlashni talab qiladi.

Xalq qabulxonalari faoliyatini kuchaytirish, murojaatlarni chuqur tahlil qilish, muammolarni joyida hal etish bo‘yicha ham qator vazifalar belgilandi. Shuningdek, davlat idoralari faoliyati murojaatlar bilan ishlash samaradorligi bo‘yicha baholab borilishi ham aytildi.

Eng muhimi, bu yig‘ilish yana bir haqiqatni eslatdi: davlatning kuchi – xalq ishonchida. Agar odamlarning muammolari tinglansa va hal etilsa, jamiyatda ishonch ham, birdamlik ham mustahkam bo‘ladi. Demak, har bir rahbar xalq dardi bilan yashab, odamlarning og‘irini yengil qilishni o‘zining asosiy vazifasi deb bilishi kerak.

Dilnoz Umurzoqova,

Sirdaryo viloyat adliya boshqarmasi Huquqiy axborot sho'basi bosh maslahatchisi