Занжир

Туғиласан...

Бироз катта бўласан...

Миянгда қандайдир ғоялар айлана бошлайди...

Орзулар, умидлар ва алламбалолар...

Аввалига ҳаммаси яхшидек... Ҳаракат қилсанг, ўқисанг, излансанг эришиш мумкин бўлган чўққи(аслида чўққияммас!)дек туйилади ва сен бор меҳрингни бериб ўқий бошлайсан!

-Ўқишга тайёрланяпсанми?

-Ҳа.

-Қайси институтга?

-(...)га

-Эҳ-ҳе, бўлмайди, киролмайсан! Ундан кўра (...)га топшир ана мени қизим ўша ерда ўқияпти. Қиз болага энг яхши касб ўқитувчилик! (Сенга айтгани камлик қилгандек ота-онангга ҳам атай айтади!)

Ўлди! Ичингдаги одам ўлди! Ишонч ўлди!

Йиллар ўтади...

Сендан ўзлари қилган қурбонликларини талаб қила бошлашади!

Кузатишларимдан шу аёнки, ҳамма ота-она фарзанди ўзидан кўра билимли, бахтли бўлишини истайди-ю, лекин шунга имкон бермайди.

"Мен 19 ёшимда турмушга чиққандим!"

"Мен сен тенги эканлигимда пул топиб, оила боқардим!"

"Фалончининг қизи иккита болали бўлди!"

"Фалончининг ўғли машина олибди!"

Ва алам қиларлиси, нафақат ота-онанг, балки ҳамма катталар сендан ўзлари қилган қурбонликни талаб қилиб, сени айблайди.

Башараларига қараб бақиролмайсан

"Нега сен шундай қилганинг учун мен ҳам шундай қилишим керак?!"

"Нега менинг ҳаётимнинг ҳам сеники каби шилтаси чиқиши керак?!" деёлмайсан!

Хўп дейсан.

Йиллар ўтади...

Энди сен катта бўласан!

Қолипдаги ҳаётинг, жинни ишинг, манфаатлар устига қурилган оиланг бор...

Қизингни дугонанг Ойпошнинг қизи ўқиётгани учун ўқитасан( лекин барибир ўзинг қилган қурбонликларни талаб қиласан! Ахир сендан ҳам талаб қилишган-ку!)

Ўғлингга бироз умид билан қарайсан, ўғил бола-да боқади!

Синфингдаги ўқувчиларингнинг умидини ўлдириш билан шуғулланасан. Умуман улардан ҳеч ким чиқмаслиги ҳақида гапириб ўлдириб борасан.

Автобусга чиқиб жой беришга улгурмаган ёшларни сўкиб кетасан.

Тўйга борасан. Ейсан! Бўккунча ейсан! Камига бир дунё қилиб тугиб оласан.

Ана энди ўғил уйлашинг керак. Ўқимаган, чаладумбул ўғлингга олий маълумотли қиз олиб бергинг келади ( лекин анови қизингни ўғлингдек думбулга икки дунёда ҳам бермайсан!).

Ғирт бегонанинг қизини ўғлингга тегмагани учун қарғайсан!

Давраларда ёшларни ёмонлайсан, бебош, ўзбошимча бўлиб кетганликда айблаб, ўз қурбонликларинг ҳақида фахр билан гапириб ўтирасан.

Занжир эса давом этаверади...