Жеті бақыт
Медет Құдайберген• Бірінші бақыт- Алланы Алла деп тануымыз
• Екінші бақыт- Бір біріне ынтығып өлердей ғашық болған Адам Ата мен Хауа анамыздан тарап, Пайғамбарымыздың үмбеті болғандығымыз.
• Үшінші бақыт- Алланы Алла деп таныған, Пайғамбардың үмбеті болған, Алланы дос тұтып әрі олардың достарымен дос болған әулие- әнбиелерді тануға деген құштарлығымыз
• Төртінші бақыт- қолдан жасап алған бақытымыз.
Қолдан жасап алған бақытымыз дегеніміз- ұрпағымыз; біз дүниеге ұрпақ әкелдік. Өсірдік. Бақтық. Қақтық. Білім бердік. Өзіміздің ойымызда саналы тәрбие бердік. Олармен мақтандық, шаттандық. Біріміз; баламыз той жасап берді, машина, үй әперді- дедік. Ал, біріміз; ұлымды ұяға, қызымды қияға қондырып дүркіретіп той жасадым, құда болып төрге шықтым, құдаларымды төрге шығардым- деп масаттандық. Баламды шетелге оқыттым- деп те кеудемізді қақтық. Ол жақта қандай білім алды, қандай білімді әкелді және өз ұрпағына қандай білімді беретінін бағамдамадық. Барлығымыз да өз бала- шағамызды ешкімнен кем көрмейміз. Кем көрмедік. Шүкір, бақыттымын деп көкірегімізді қақтық. Шынын да солай ма. Оны мына пәниден көшкенде ғана біле аламыз.
Адам ұрпағымен ғана мың жасайды.
Ешбір бала ата- анасының жасаған күнәсіне жауап бермейді, алайда, ата- ана өз ұрпағының күнәсі мен кінәсіне жауапты.
Ұрпақты саналы тәрбиелей алдық па және олар да өз ұрпақтарына саналы тәрбие бере алды ма(???)- бұл үлкен мәселе. Ойланған адамға ауыр жауапкершілік. Алайда, бұл бақытты қолдан жасап өзімізді алдауқыратып бағамыз. Ұрпағымызбен мың жасауымыз үшін, әуелгі үш бақытты олардың санасына сіңіруге мәжбүрміз
• Бесінші бақыт- бұл жерде толыққанды бақыттымыз деп айта аламыз. Көрерге көз, естірге құлақ, жүрерге аяқ, ұстарға қолымыздың болуы.
• Алтыншы бақыт- дымқыл жер. Ата-ана. Жақсы тәрбиелеген ата- анадан жаман бала шығуы мүмкін. Жаман ата- анадан жақсы бала тәрбиеленіп шығуы мүмкін. Ата- ананы таңдау еркі адамға берілмеген. Оны таңдаған Алла Тағаланың Өзі. Алланың таңдауына разы болып болмау әркімнің өз еркінде…
• Жетінші бақыт- қайырлы өлім. Алла разы болып адамдарға пайдалы еңбек ету арқылы- қайырлы өлімге жетуіміз мүмкін. Алланың разылығына бөлене отырып жақсы іс істеу. Адам баласы үйде отырып та бұл еңбекті жасап кете алады.
Еңбек бар жерде табыс бар. Табыс бар жерде дүние бар.
Дүниені қайырлы өлім үшін тапқанда ғана, дүние адал болмақ.