Жаннатдан уй

#РEПОСТ

Ассалому алайкум ва роҳматуллоҳ.

Мусофирчиликда ўқишдан қийини йўқ экан. Айниқса Туркиядек қиммат жойда мустақил тарзда ўқитиш жуда ҳам қийин экан. Биргина жой муаммоси ҳаммасидан ошиб тушар экан. Толиби илмларимизнинг бундай машаққат ичида ўқишларини ҳеч биримиз истамасак керак. Келажакда халқимизнинг бу ёрдамини албатта унутмайди ва бу ёш толиби илмлар ҳам ўзларидан кейингиларга сиз каби қўлидан келганича ёрдам беради: «Мени ҳам халқим ўқитган эди, менга ёрдам берган, энди сизларга ёрдам бериш менинг бурчим ва қарзим, дейди иншаллоҳ».

Кечаги постимдан кейин кўплаб дўстларимиз ушбу постни ёзишимни тавсия қилдилар. Улар мени бу постни ёзишга қўллаб қувватламаганларида эди, балки ҳеч қачон ёзмаган бўлар эдим балки.

Азизлар, тома-тома кўл бўлур. Билмаймиз, Аллоҳ таоло кимнинг берадиган эҳсонига қанча барака қўйган, Ўзигагина аён.

Азизлар! Бир бўлиб толиби илм укаларимизга ҳеч йўқса биттагина бўлса ҳам уй олайлик. Уларни уй-жойсизликда сарсон-саргардон бўлиб юришларидан халос бўлишларига ўз ҳиссамизни қўшайлик.

Ажаб эмас, биз толиби илмлар уйи учун берган биргина эҳсонимиз билан жаннатдан қаср сотиб олган бўлишимиз мумкин. Аллоҳ таоло бекорга толиби илмларни энг азиз қилиб қўймаган. Ҳатто фаришталар уларни ҳурмат қилиб, толиби илмнинг аёқлари остига қанотларини ёзади.

Абдуллоҳ ибн Муборак шундай дейдилар: «Пайғамбарликдан кейин (инсонларга) илм етказишдан ҳам афзал даражани билмайман».

Имом Раббоний шундай дейдилар: «Толиби илмга қилинган бир дирҳамлик ёрдам минглаб камбағалларга қилинган миллионлардан афзалдир».

Шайх Муҳаммад Аввома ҳазратлари суҳбатларида толиби илмларга кафиллик қилишга кўп тарғиб қиладирдилар. Бир неча ўринда: «Етимга десанг кафил топилади, камбағалга деган сахий топилади, касалга десанг ҳомий топилади, аммо толиби илмга топилмайди, шу сабабли бойларни толиби илм ва илмга ҳомийлик қилишга чақиришимиз керак», деб айтар эдилар.

Азизлар! Нега аввалгидек забардаст олимларимиз кўп эмас? Шайх ҳазратларидан кейин у кишидек олим ҳали ҳам чиқмаяпти! Ёрқинжон ҳазратларидек олимимиз нега яна йўқ? Бунинг энг катта сабаби толиби илмларимизни етарлича моддий қўллаб қувватлай олмаяпмиз. Аччиқ, лекин ҳақиқат. Забардаст раббоний олимларимизни кўпайтиришимизнинг ягона йўли уларнинг ўқиши учун шарт-шароитларни муҳайё қилиб қўйишдир.

Агар ҳозир кичик бўлсада бир камбағал оила кўчада қолганда, аллақачон уларга бир уй олиб берган бўлар эдик. Икки ой ичида 60та талабамиз турган жойларини бўшатиб беришлари керак. 2-3 та эмас, роппа-роса 60 толиби илм. Сиз азизлардан ўша талабалар ўрнига ўз фарзандингизни қўйишингизни илтимос қилган бўлардим.

Далолат қилинг, савобда шерик бўлинг.

Муҳаммад Одил Ҳамид. Истанбул, Туркия. 1.03.2022.

Ўзимга алоқага чиқинг:

Shaxsiy Telegram: https://t.me/odiljonhamid1986

Shaxsiy Facebook: https://www.facebook.com/muhammadodiluzofficial/

Shaxsiy Instagram: https://www.instagram.com/muhammadodiluz/