Жаҳонда коронавирусдан зарарланган 703,8 миллион бемордан 7,0 миллиондан ортиғи вафот этган

Бу ҳақда АОКАда ўтказилган брифингда Санитария-эпидемилогик осойишталик ва жамоат саломатлиги қўмитаси раисининг биринчи ўринбосари Нурмат Отабеков маълум қилди.

Бугунги кунда дунёдаги 221 давлатда коронавирус инфекциясидан зарарланган кишилар сони 703,8 миллион нафарга етди, улардан

7,0 миллиондан ортиғи вафот этди. Сўнги кунларда бир сутка ичида

7,0-10,0 мингта янги касалланиш ҳолатлари қайд этилмоқда.

Ўзбекистон Республикаси билан чегарадош бўлган Қозоғистонда 1,4 млн, Афғонистонда 231,5 минг, Қирғизистонда 206,9 минг, Тожикистонда 17,8 минг ҳолатда коронавирус касаллиги рўйхатга олинган.

2024 йил 01 март ҳолатига Ўзбекистонда касалланиш

261 085 нафарга етди, соғайиш 99,1 фоизни ташкил қилмоқда. 1637 нафар (0,06%) фуқаро ушбу касалликдан вафот этган.

Касалликнинг тарқалганлик даражаси 1,0 ни ташкил этмоқда (ЖССТ экспертлари хулосасига кўра бу кўрсаткич 1,0 гача бўлса вазият барқарорлигини англатади).

Касалликнинг юқтириб олиш манбаи 35-43% ҳолатда касалланган оила аъзоси ёки қариндошлари, 6-7% ҳолатда бемор кўшнилари, 10-12% ҳолатда жамоат жойларидаги мулоқот, 4-5 % ҳолатда иш жойидаги мулоқот эканлиги аниқланмоқда.

Вирус геномини ўрганиш (секвенлаш) бўйича ўтказилган сўнги таҳлилларнинг 100 фоизида “омикрон” штамми аниқланган.

Бутун дунёда COVID-19га қарши курашишнинг энг самарали усулларидан бири сифатида унга қарши вакциналар билан эмлаш, деб қаралмоқда.

Республикада COVID-19ra қарши эмлаш жараёни учун жами 86,6 млн доза вакцина олиб келинди ва ишлаб чиқарилди. Бугунги кунга қадар 85,2 млн доза вакцина қўлланилди, шундан:

тўлиқ вакцина курсини олганлар – 18,1 млн нафар (режага нисбатан – 78 фоиз), бустер доза олганлар – 18,6 млн нафар (режага нисбатан – 80 фоиз), ревакцинация қилинганлар– 14,7 млн нафарни ташкил этди.

Ҳозирда, Санитария-эпидемиология қўмитасининг вакцина сақлаш омборхоналарида Johnson & Johnson ва Pfizer-BioNTeсh вакциналари захираси мавжуд.

Дунё мамлакатларида кузатилаётган эпидемиологик вазиятдан келиб чиқиб ҳамда Жахон соғлиқни сақлаш ташкилотининг халқаро тиббий санитария қоидалари юзасидан қабул қилган тавсияларига мувофиқ ва дунё мамлакатларининг тажрибаларидан келиб чиққан ҳолда, Республикасимиз ҳудудида коронавирус тарқалишининг олдини олиш юзасидан фуқароларимиздан шахсий гигиена қоидаларига қатъий риоя этиш, қўлларни вақти-вақти билан антисептиклар билан зарарсизлантириш, зарур ҳолатларда яъни беморлар билан мулоқот қилганда ниқоб тақиш қоидаларига амал қилиш, коронавирусга инфекциясига қарши бустер дозаларда ревакцинация ишларини давом эттириш тавсия этилади.

Қизамиқ бўйича эпидемиологик вазият назорат остида бўлса ҳам, қизамиқ касаллигига шубҳа қилинган шахслар билан алоқада бўлганлар эпидемиологик кўрсатма асосида профилактик эмлаш билан қамраб олинди.

Республикамизнинг барча ҳудудларида қизамиқ ва қизилчанинг олдини олиш бўйича қатор тренинглар ва семинарлар ўтказилди. 9 500 нафар тиббиёт ходими қизамиқ-қизилча касаллигини эпидемиологик назорат қилиш, иммунопрофилактика тадбирларини ўтказиш бўйича ўқитилди. Бирламчи тиббий муассасаларда қизамиқнинг олдини олиш бўйича 120 000 та рисолалар чоп этилди ва тарқатилди. Иш режасига асосан маҳаллаларда 10 230 та, боғча ва мактабларда 7 985 та, соғлиқни сақлаш муассасаларида 3 793 та қизамиқ касаллиги ҳақида ва қизамиққа қарши эмлаш бўйича учрашувлар ташкил этилди. Шифокорлар билан учрашувларда 18 ёшгача бўлган болаларни қизамиққа қарши эмлаш холатини тафтиш қилиб эмланиши зарур бўлган ва ўчоқлардаги мулоқатда бўлганларни эмлаш, карантин чораларини қўллаш, диференциал диагностикани кучайтириш ва тўғри диагноз қўйиш талаб этилиши такидлаб ўтилди.

2023 йил давомида қизамиққа қарши жами 1 575 558 нафар болалар миллий эмлаш календарига мувофиқ эмланди. Улардан 879 314 нафари 1 ёшдаги ва 696 244 нафари 6 ёшдаги болалар КПК вакцинаси (қизамиқ+эпид.паротит+қизилча инфекцияларига қарши) билан режа асосида эмланди.

2 444 439 нафар аҳоли эса эпидемик кўрсатма бўйича КК (қизамиқ +қизилча) вакцинаси билан эмланган бўлса жорий йилнинг ҳозирига қадар   жами 123 534 нафар болалар миллий эмлаш календарига мувофиқ эмланди. Улардан 76 897 нафари 1 ёшдаги ва 46 637 нафари 6 ёшдаги болалар КПК вакцинаси (қизамиқ+эпид.паротит+қизилча инфекцияларига қарши) билан режа асосида эмланди. Қизамиққа қарши эпид кўрсатма бўйича

2024 йил 1 мартгача 6 ойликдан 7 ёшгача бўлган 2 780 541 нафар (99,6%) болалар эмланди.