ЖССТ энг хавфли «омикрон» штаммининг келиб чиқиш версиясини эълон қилди

Коронавируснинг янги хавфли варианти бўлган «омикрон» инфекциядан тўлиқ тузалмаган, иммунитети заиф одамда шаклланган бўлиши мумкин. Бу ҳақда Жаҳон соғлиқни сақлаш ташкилоти бош эпидемиологи Мария Ван Керхове «Financial Times» газетасига берган интервьюсида хабар берди.

Маълум қилинишича, бу вируснинг келиб чиқиши ҳақидаги якуний хулоса эмас, шунчаки гипотеза ҳисобланади.

«Ушбу штамнинг қаердан келиб чиққани номаълум, аммо кўриб чиқилаётган гипотезалардан бири шундаки, у вирусдан тўлиқ тузала олмаган ва организмида вирус сезиларли даражада кўпайган, иммунитети пасайган, инфекцияланган бемордан келиб чиққан бўлиши мумкин», — деган ЖССТ вакили.

Таъкидланишича, «омикрон»нинг пайдо бўлиши сабабли Ван Керхове жаҳон ҳамжамиятини штамм биринчи марта аниқланган давлатни айбламасликка чақирган. Бунинг ўрнига у ковиднинг барча турларини диққат билан кўриб чиқиш ва кўпроқ синов ҳамда тадқиқотлар ўтказиш кераклигини айтган.

Эслатиб ўтамиз, Жаҳон соғлиқни сақлаш ташкилоти «омикрон» штамини дунёга таҳдид солувчи коронавирус тури деб тан олган. Бу штамнинг тезликда тарқалаётгани ва мавжуд вакциналар унга қарши самарасиз бўлиши мумкинлиги билан изоҳланган.

Аввалроқ дунё аҳолиси коронавируснинг янги мутацияси хавфи ҳақида огоҳлантирилганди. Шунингдек, ЖССТ коронавируснинг асосий ташувчилари ким эканини маълум қилганди.