ЖОНТЕМИР
https://t.me/vaqt_manzili* * *
Тун. Қайдадир нимадир чархланаётир,
Бир маром таралар оҳанги "шағ-шағ".
Тўмтоқ чўққиларни қачовга тортиб
Ўткирлаётгандир тирноғида Чарх?
Балки Балх дорига девона Машраб
Арвоҳи севиниб бўйнини ишқар?
Балки чақмоғини ғазабнок тишлаб
Коинот куюккан кўнглини хушлар?
Ё шундай янграрми Ажал ҳуштаги?
Қўрқув ханжарига топилмайди қин.
Нафис тасаввурим очган қушларин
Кўлвордек ямламай ютаётган ким?
На уйқу элитар, на шароб далда,
Нечун қурбонликдай жимирлар этим?
Нечун лаҳад каби кўринар – даҳшат,
Ойни чайнаётган осмоннинг чети?
Ким кўҳна ўчини олмоқчи мендан?
Кимнинг шарпасисан эй, золим шотир?
"Бўғилиб чиқмоқда бу сас ичингдан –
Тун. Виждон юракни жим чархлаётир..."