Yiqilgan "yakkashox": qanday qilib kompaniyani yo‘qotib milliarderga aylanish mumkin
Zenefits HR-kompaniyasi qulagach toʻrt yil oʻtib, uning noaniq asoschisi yana bir HR startapi Rippling bilan qaytdi. Bu safar Parker Konrad muvaffaqiyatga erishdi: Rippling tufayli uning boyligi ikki yil ichida 2,2 mlrd dollarga oʻsdi. Startapning hammuassisi ham milliarder hisoblanadi.
Oʻzining birinchi HR startapi Zenefits qulaganidan olti yil oʻtgach, Parker Konrad intiqom oldi. Uning yangi HR startapi – Rippling 11,25 mlrd dollarga baholangan, Forbes esa Konradning boyligini 2,2 mlrd dollarga baholamoqda.
Konrad 2016-yil fevral oyida Zenefitsni tark etishga majbur boʻldi va yangi boshqaruv ostida sobiq “yakkashox” xarajatlarni qisqartirdi, uning bahosi esa qariyb ikki baravar tushib ketdi. Biroq, 2016-yilning apreliga kelib, bir necha oy uyda tushkunlikka tushib, “Yulduzlar jangi” ni tomosha qilgandan soʻng, Qimmatli qogʻozlar va birjalar komissiyasi (SEC) va sugʻurta regulyatorlari uning startapini tekshirishni boshlagach, Konrad yangi HR-startap — Rippling boʻyicha ish boshladi.
U oʻtmishdagi xatolarni takrorlamaslik uchun juda koʻp gʻoyalarga ega edi, koʻplab venchur kapitalistlar ham unga yordam berishga tayyor edilar. Bugungi kunda texnologik kompaniyalar aksiyalarining bahosi tushib ketdi va koʻplab venchur kapital kompaniyalarining kutishdan boshqa yoʻli qolmadi. Biroq, 42 yoshli Konrad inqirozga tayyor — bir oy oldin u Ripplingda 250 mln dollar toʻplagan.
Garchi Konrad ushbu maqola uchun intervyu berishdan bosh tortgan boʻlsa ham (u ham, Rippling ham uning holati haqida izoh bermagan), may oyida San-Fransiskodagi uyidan olgan video intervyusida Rippling hali hanuz avvalgi moliyalashtirish raundidan jalb qilingan mablagʻ borligini va yangi kapitalga ehtiyoji yoʻqligini aytgan. “Men uchun maqsad kompaniyani har qanday mumkin boʻlgan makroiqtisodiy zarbalardan himoya qilish edi”, — dedi u oʻsha paytda. “Men ularni butkul taxmin qila olmayman.“
Endilikda uning ikkinchi HR startapi koʻtarilgan boʻronni bir talay naqd pul bilan yengishga tayyor. Kompaniya Kleiner Perkins, Sequoia va Initialized Capital kabi yetakchi firmalardan jami 700 mln dollar yigʻdi. Zenefits bilan muvaffaqiyatsizlikka uchragach, Konrad oʻtmishdagi xatolarning oldini olish uchun Ripplingʻga xodimlar yolladi. Ular orasida LiveRamp kompaniyasidan kelgan bosh maslahatchi Vanessa Vu va Snapda ishlagan moliya direktori Adil Sayed bor.
Amerikaning Forbes jurnali Rippling haqida ikki yil avval “2020-yilning navbatdagi milliard dollarlik startaplari” reytingining bir qismi sifatida yozgan. Konrad dasturiy taʼminot orqali inson resurslarini boshqarishni soddalashtirishni maqsad qilib olgan Rippling bilan ortga qaytishga urindi va bu ish haqida ochiq-oydin gapirdi.
Zenefits oʻzining eng yuqori choʻqqisida 4,5 mlrd dollarga baholangan edi. Rippling hozir bundan ikki yarim baravar qimmatroq. Badavlat oilada ulgʻaygan va Garvardda oʻqigan, qizgʻish soqolli, to‘ladan kelgan Konrad birinchi marta milliarderlar klubiga kirdi. Uning asoschisi, Zenefitsning muhandislik boʻyicha sobiq direktori 34 yoshli Prasanna Sankar hozir ham milliarder boʻlib, Forbes uning boyligini taxminan 1 mlrd dollarga baholamoqda.
Ripplingʻning afzalligi shundaki, u nafaqat ish haqini avtomatlashtiradi, balki yangi xodimlarga kerak boʻlgan dasturiy vositalar, ilovalar va ishchi guruhlarni avtomatik ravishda boshqaradi va xodimlar lavozimga koʻtarilish, jamoani oʻzgartirish yoki ketishda ularni yangilaydi. Bu maʼmuriy ishning eng jozibador qismi emas, ammo u kompaniyalarga son-sanoqsiz vaqtni tejab qolishga, shuningdek, bogʻliq qiyinchiliklar va xarajatlarni bartaraf etishga yordam beradi.
Kompaniya tashkil etilganidan beri jadal surʼatlarda rivojlanmoqda. Bugungi kunda uning doimiy yillik daromadi (ARR) 100 mln dollardan oshadi – kompaniya aniq bir summani aytishdan bosh tortdi, 2020-yilda bu koʻrsatkich 13 mln dollarni tashkil etgan edi. ARRdan past boʻlgan buxgalteriya hisobi daromadi bu — marketing koʻrsatkichi boʻlib, uni Rippling kabi dasturiy taʼminot kompaniyalari obuna uchun foydalanishni afzal koʻradi.
“Ripling ustida ish olib borayotganimizda dastlab tez-tez mijozlar bilan bogʻlanardik, ular esa Zenefits tufayli bizdan qochib ketishardi”, — dedi Konrad shu bahorda. “Men doim odamlarni qiziqtiradigan yanada jozibali mahsulotni yaratishimiz kerak deb oʻylaganman... Biz bu toʻsiqni yengib oʻtish uchun ikki baravar zoʻr boʻlishimiz lozim, qaysidir on shubhalar oʻzidan-ozi yoʻqoladi va bu kompaniyaga katta yuksalishni beradi.“
https://www.forbes.ru/milliardery/469855-padsij-edinorog-kak-poterat-kompaniu-i-stat-milliarderom