Yaroqsiz goʻsht manziliga yetmadi
Qashqadaryo viloyati IIB Axborot xizmati
Koʻkdala tumani “Umakay” muntazam YPX maskanida 2023 yil 11 may kuni soat 19.35larda “Qarshi — Toshkent” yoʻnalishida harakatlanib kelgan “Lasetti” rusumli avtomashina Qashqadaryo viloyati ichki ishlar boshqarmasi Jamoat xavfsizligi xizmati patrul-post xizmati va jamoat tartibini saqlash boshqarmasi Karantin boʻlinmasi va Yoʻl harakati xavfsizligi boshqarmasi xodimlari tomonidan toʻxtatilganda, haydovchi oʻzini bejo tutdi. Bu bejizga emas ekan, avtomashina salonida kelib chiqishi nomaʼlum boʻlgan goʻsht mahsulotlari bor edi. Bu kamlik qilganidek, yukxonada ham goʻsht chiqdi.
Surishtiruvlar davomida Koʻkdala tumanida yashovchi E.SH.ning boshqaruvidagi avtomashinadan 118 kg goʻsht hujjatlashtirib olindi.
Goʻsht mahsulotlarining sifatini aniqlash maqsadida, Qashqadaryo viloyat hayvonlar kasalliklar tashxisi va oziq-ovqat mahsulotlari xavfsizligi davlat markazining laboratoriyasiga olib kelinib, tekshiruvidan oʻtkazilganda isteʼmolga yaroqsizligi aniqlandi.
Mazkur holat yuzasidan fuqaroga maʼmuriy bayonnoma rasmiylashtirilib, goʻsht mahsulotlari yoʻq qilindi.