"ЁРМОК" КОНИДAН ТAБИИЙ ГAЗНИНГ СAНОAТ ОҚИМИ ОЛИНДИ
@minenergy_uz2019 йил 28 октябр куни "Ёрмок" конидан кунига 250-300 минг куб метр дастлабки дебит билан табиий газнинг саноат оқими олинди.
"Ёрмоқ" конидаги ишлар Ўзбекистон Республикаси Президентининг 2017 йилда тасдиқланган "2017-2021-йилларда минерал-хомашё базасини ривожлантириш ва қайта ишлаб чиқариш Давлат дастури"га мувофиқ Қашқадарё нефт ва газ минтақасида иқтисодиёт тармоқлари ва аҳолини табиий газ билан таъминлаш учун хомашё базасини кўпайтириш ва углеводород хомашёсини қазиб олишга қаратилган геология-техник тадбирлар доирасида амалга оширилмоқда.
Шуни таъкидлаш жоизки, 2019 йил бошидан буён "Ўзбекнефтгаз" АЖ бешта нефт-газ ҳудудларида геология-қидирув ишларини мунтазам равишда давом эттирмоқда ва бунинг натижасида 5 та янги кон очилган. Углеводород хомашёси захираларининг ўсишини таъминлаш учун илгари очилган конларда қидирув ишлари давом эттирилмоқда.
Ушбу кон Қашқадарё вилояти Ғузор тумани ҳудудида жойлашган. Юра давригача бўлган корбанат нефт-газ қатламларини ўрганиш учун жорий йилнинг 10 мартидан бошлаб 3-қидирув қудуғини бурғилаш бошланган. Бурғулаш чуқурлиги 3300 метрни ташкил этди. Натижада, қудуқни 3 минг метр чуқурликдан кейин бир қатор интервалларда синовдан ўтказиш жараёнида табиий газнинг саноат оқими қўлга киритилди.
Қудуқда келгуси 3 кун ичида истиқболли қатлам параметрларини ўрганиш учун газ конденсати тадқиқотлари ўтказилади. Шунингдек, "Ёрмоқ" конида қудуқларни бурғилаш орқали қидирув ишларини давом эттириш режалаштирилган.
Ўзбекистон Республикаси Энергетика вазирлиги матбуот хизмати "Ўзбекнефтгаз" AЖ билан ҳамкорликда тайёрлади