Янгиликлар
Uzpharmagency
Жорий йилнинг 10 сентябрь куни Соғлиқни сақлаш вазирлиги ҳузуридаги Фармацевтика тармоғини ривожлантириш Агентлигида Ўзбекистон Республикаси Давлат фармакопеяси таҳририят кенгашининг биринчи кенгайтирилган мажлиси бўлиб ўтди.
Унда Ўзбекистон Республикаси Президентининг 2019 йил 10 апрелдаги “2019-2021 йилларда Республиканинг фармацевтика тармоғини янада жадал ривожлантириш чора-тадбирлари тўғрисида”ги ПФ-5707-сон Фармонида, Фармацевтика маҳсулотларининг сифати ва улар сифатини назорат қилиш усулларига қўйиладиган замонавий халқаро талабларни ҳисобга олган ҳолда Ўзбекистон Республикаси Давлат фармакопеясини нашр этиш бўйича белгиланган вазифани бажариш билан боғлиқ масалалар муҳокама этилди.
Жумладан Ўзбекистон Республикаси Давлат фармакопеясининг биринчи жилдини чоп этишга тайёрлаш ишларини ташкил этиш ва уларни ижросини таъминлаш.
Шуни алоҳида қайд этиш лозимки, Ўзбекистон Республикаси Давлат фармакопеясини нашр этишга тайёрлашда унинг тузилиши лойиҳаси Соғлиқни сақлаш учун дори воситаларини сифати бўйича Европа директорати ва Фармацевтика тармоғини ривожлантириш агентлиги ўртасида 2019 йил 20 мартда имзоланган келишувга асосан Европа фармакопеяси билан уйғунлаштирилган ҳолда амалга оширилиши белгиланган бўлиб, бунда АҚШ, Буюк Британия, Япония ва алоҳида МДҲ давлатлари фармакопеялари билан тегишли мақолалар адаптация қилинган.
Бу эса ўз навбатида Ўзбекистон фармацевтика корхоналари томонидан ишлаб чиқариш, шунингдек Ўзбекистон Республикасига импорт қилинадиган дори воситалари ва тиббий буюмларни стандартларини халқаро талаблар даражасида такомиллаштириш йўли билан уларни сифатини кўтаришни таъминлайди.
Манба: Фармацевтика тармоғини ривожлантириш Агентлиги матбуот хизмати