ЯПОНЧА ТАРБИЯ

Бугун ишдан сўнг уйга қайтаётганимда ажойиб воқеани гувоҳи бўлдим. Хуллас, биз яшайдиган кўп қаватли бинонинг кираверишига етганимда, қайсидир қўшнимиз боласига танбеҳ бераётганини эшитдим. Бировнинг гапини зимдан кузатиш яхши эмас, аммо, қизиқ.

Қани, японлар қанақа қилиб фарзандларини тарбиялайди, деб қулоқ тутдим. Қўшнимиз зинанинг тепасида, мен пастда. Бир- биримизга кўринмаймиз. Лекин овозлар эшитилади: - Акичан (чан - исмларга эркалаш маъносини берадиган қўшимча), мен ишдан чарчаб келганимга, ҳозирги кунларда жуда банд бўлишимга қарамай, атай сайр қилишга олиб чиқдим. Сен бўлсанг, йўлда мошина йўлига чиқиб кетай дединг. Яхшиямки ушлаб қолдим. Агар ушлаб қолмаганимда мошина уриб кетганда нима бўларди? Жонинг азоб чекар ёки сендан айрилиб қолсам, кейин қандай яшардим? 

Бошқа унақа қилма, хўпми? Машина йўлларга чиққанингда жуда ҳам эҳтиёткор бўлишинг керак! Сени жуда ҳам қаттиқ яхши кўраман. Илтимос, бошқа такрорламайман, деб, менга ваъда бер. Ваъда берасан-а? 

Яхши, энди уйга кирамиз. Мендан хафа бўлма, сени урушмадим. 

Бу гапларни эшитдиму, ичимда ўзимга ўзим такрорладим. Мана Японча тарбия, мана Японча интизом, мана болани қандай тарбиялаш керак. Ана шунинг учун ҳам булардан нобелчилар чиққан, ана шунинг учун ҳам булар тартиб-интизомда дунёда биринчи ўринда туради. Ана шунинг учун ҳам булар ривожланиб кетган. 

Шу каби хаёллар миямда айланиб, зинадан кўтарилдим. Кўтарилдиму, не кўз билан кўрайки, бояги япон қўшнимиз кучугига гапириб ётган экан. Хеҳ, сени тарбиялашинга ҳавасим кетмай мен ўлай...

Баҳодир Искандаров.