Xalqaro innovatsion kompaniyalarni rivojlantirish va boshqarishda “Huawei” kompaniyasi tajribasi

Joriy yilning 20-aprel kuni Biznes va tadbirkorlik oliy maktabida “Biznesda mahorat darslari” loyihasi doirasida “Xalqaro innovatsion kompaniyalarni rivojlantirish va boshqarishda “Huawei” kompaniyasi tajribasi” mavzusida professor-o‘qituvchilar va tinglovchilar ishtirokida innovatsion loyihalarni boshqarishning zamonaviy tendensiyalari va amaliyotlariga bag’ishlangan navbatdagi mahorat darsi bo‘lib o‘tdi. 

Tadbir Xitoyning Huawei kompaniyasi vakillari bilan hamkorlikda o‘tkazildi va tadbirning mehmon ma’ruzachisi sifatida – Huawei xalqaro kompaniyasining O‘zbekistondagi bosh direktori Chen Jiakay taqdimot qildi.

Chen Jiakai Huawei kompaniyasining xalqaro innovatsion kompaniyalarni rivojlantirish va boshqarish bo‘yicha tajribasi bilan o‘rtoqlashdi, muvaffaqiyatli strategiyaning asosiy jihatlari va loyihalarni samarali boshqarish tamoyillarini yoritib berdi.

Huawei - 1987-yilda tashkil etilgan Xitoy kompaniyasi bo‘lib, u o‘z sayohatini telekommunikatsiya sohasida mutaxassis sifatida boshlagan. Yillar davomida u dunyoning telekommunikatsiya va smartfon uskunalarini yetkazib beruvchi yetakchilaridan biriga aylanish uchun o‘z imkoniyatlarini kengaytirdi.

Kompaniya tarmoq texnologiyalari, bulutli hisoblash va sun’iy intellekt sohalarida faol rivojlanib, innovatsion taraqqiyotda muhim o‘ringa egadir. Uning muvaffaqiyatli rivojlanishi va olib borayotgan ishlar ko‘lami kompaniyani global texnologiya sanoatidagi o‘rnini mustahkamlashda muhim ahamiyat kasb etgan.

Shuningdek, master-klass doirasida, Huawei kompaniyasining mahsulot va xizmatlarini yaxshilash hamda biznesni boshqarish va rivojlantirish bo‘yicha ilg‘or tajribalarni joriy etish imkonini beruvchi turli sohalardagi xalqaro kompaniyalar bilan hamkorligi muhokama qilindi.

Tadbir davomida kompaniyaning texnik tajribasi tarmoq effektini yaratishi haqida so‘z bordi. Uning mahsulotlari va yechimlari ko‘plab kompaniyalar va ishlab chiquvchilar uchun standart bo‘lib, ularning keyingi muvaffaqiyatli rivojlanishi va ishlashiga yordam beradi.

Mahorat darsi yakunida muhokama va savol-javob sessiyasi bo‘lib o‘tdi, unda ishtirokchilar Huawei kompaniyasi faoliyatiga oid va innovatsiyalarni boshqarishdagi zamonaviy tendensiyalarini muhokama etishdi. 

Mahorat darsi biznes va innovatsiyalar sohasida kelgusidagi loyihalar uchun g'oyalar va rejalarni faol almashish bilan yakunlandi.