Вобкент: Ўзбаконда "Sendi" зотли товуқ кўпайтирилмоқда
Етти хазинанинг бири паррандачиликда ҳам барака мўл. Чунки товуқ парваришидан тухум билан бирга парҳезбоп гўшт етиштириш, рўзғорни бутлаш мумкин. Вобкент тумани "Ўзбакон" маҳалла фуқаролар йиғини Зарметан қишлоғида яшовчи Наврўз Зайниев ҳам ана шу оддий ҳақиқатни теран тушуниб етиб, хонадонида товуқ парваришини йўлга қўйганига уч йил тўлибди.
—Аввал товуқ боқишни бир ҳавас деб билган бўлсак, эндиликда биз учун бу ҳам тирикчилик манбаи, дастурхон тўкинлиги, ҳам даромадбоп бизнесга айланди,—дейди Наврўз Зайниев.—Аслида, қишлоқ шароитидаги ҳар бир ҳовлида бу сердаромад бизнесни йўлга қўйиш мумкин, фақат астойдил меҳнат қилинса бўлди. Уч йил бурун товуқнинг тухумчилик йўналишидаги “Sendi” зотидан 100 бошини харид қилиб, оғилхонамизни бир қисмини катак кўринишида тайёрлаганмиз. Унда ички ҳароратни сақлаш имкониятини қилиб, хона шифтига “Evrozol” тўшамасини қоплаб, парранда учун томчилатиб сув бериш ускунасини ҳозирлаб, иш бошлагандик. Товуқлар учун зарур биологик қўшимча ва эмлаш дориларини ҳам суви-емига омухта қилиб парваришлаб, бир йилдан кейин 200 бошга, шу йил эрта баҳоридан эса 300 бошга етказишга эришганимиз катта ютуғимиздир. Очиғи, бошида бу ишим юришмаса, чет элга ишлашга кетаманми деган ўйда эдим, энди бунга ҳожат йўқ.
Бугунга келиб навқирон йигитнинг қўли остидаги товуқлари тухумга кирган ва кунига 85 фоизга етказиб, яъни ўртача 250 тагача тухум олинмоқда. Бозор нархи 1200-1500 сўмдан ҳисобланганда, бир оиланинг тухумдан кўраётган кунлик фойдаси 350 минг сўмдан кам эмас. Бундан кўринадики, хонадонда боқилаётган паррандалар кунлик эҳтиёжи қопланиб, оила харажатдан даромад қилишга ўтган. Бу тушумни йил бўйи қилинаётган меҳнатга нисбатан кўпайтирганда, бир оиланинг товуқчиликдан эришаётган умумий даромади 110 миллион сўмдан ошади. Қолаверса, тухумдан қолган товуқлар гўштга топширилаётгани ҳам қўшимча фойда дегани.
Шу билан чекланиб қолмаган Наврўз Зайниев 5 сотихли томорқасини ҳам яшнатиб, ярмида картошка экиб етиштирмоқда. Ҳадемай, бу ердан 700 килограмдан ошиқ картошка ковлаб олиниб, рўзғор кам-кўсти тўлдирилади. Яна қишлоқ хонадонида сигир-бузоқ, наввос, қўй-қўзи боқишга қизиқиш кучли. Демак, оила дастурхонида сут-қатиқ, гўшт таъминоти жойида. Муҳими, ҳалол меҳнат ортидан Зайниевлар хонадони бадастирлиги таъминланмоқда.
Вилоят ҳокимлиги матбуот хизмати