UZEX ҲАФТАЛИК ДАЙДЖЕСТИ (19 – 25 АПРЕЛЬ)

UZEX ҲАФТАЛИК ДАЙДЖЕСТИ (19 – 25 АПРЕЛЬ)

"ЎзРТХБ" АЖ PR бўлими

Ўтган ҳафта давомида, яъни 19 – 25 апрель кунлари "Ўзбекистон республика товар-хом ашё биржаси" АЖ нинг барча савдо платформаларида 1 641,1 млрд сўмлик товарлар сотилган бўлиб, бу аввалги ҳафтага нисбатан 3,9% га камдир. Бунда сотувларнинг 86,8% - биржа савдолари, 1,4% - кўргазма-ярмарка савдолари, 11,4% - электрон давлат харидлари ва 0,4% - авторақамларнинг онлайн-аукционига тўғри келди.

Кичик бизнес ва хусусий тадбиркорлик субъектлари иштирокида тузилган битимларнинг умумий ҳажми 703,5 млрд сўмни ташкил қилди. Давлат харидлари тизимларида ўтказилган электрон савдолар натижасида бюджет ва корпоратив буюртмачиларининг қарийб 34,2 млрд сўмлик маблағлари тежалди.

Кўриб чиқилаётган давр мобайнида онлайн аукцион орқали 3 128 та авторақамлар сотилди, сотилган давлат рақам белгиларининг умумий суммаси 5,7 млрд сўмни ташкил қилди. Рақобатли савдолар натижасида битимларнинг 3,0% биринчи тоифадаги авторақамларга, 9,9% иккинчи, 13,6% учинчи, 13,3% тўртинчи, 20,0% бешинчи ва 40,2% олтинчи тоифа авторақамларга тегишлидир.

Биржа савдолари

Кўриб чиқилаётган даврда очиқ биржа савдолари орқали жами 1 424,9 млрд сўмлик товар ресурслари сотилди. Сотувчи корхоналар маҳсулотларни тасдиқланган жадвалларга риоя қилган ҳолда биржа савдоларига қўйишди, шу жумладан:

Пахта ёғи

Ўтган ҳафтада биржа савдолари орқали 1 642,0 тонна пахта ёғи сотилган бўлиб, бу аввалга ҳафтага нисбатан 21% га камдир. Электрон савдоларда иштирок этган харидорларнинг ўртача кунлик сони 156 кишини ташкил қилди.

Кўриб чиқилаётган даврда барча навли пахта ёғининг кунлик ўртача нархлари маҳсулотнинг бир тоннаси учун 17 348,2 минг сўмдан 17 013,0 минг сўмгача, яъни 2% га пасайди. Ҳафта якунларига кўра 1-навли пахта ёғининг ҳафталик котировкаси маҳсулотни бир тоннаси учун 17 409,1 минг сўмни ташкил этди.

Бугунги кунда пахта ёғининг ички нархларини барқарорлаштириш мақсадида биржада бозор усулларидан фойдаланилмоқда. Жумладан, талаб ва таклифнинг мутаносиблигини қўллаб-қувватлаш мақсадида биржа савдоларига импорт қилинган ўсимлик ёғи ҳам қўйиб борилмоқда.

Айни пайтда биржанинг хорижий савдо майдончлари орқали ҳар куни Беларуснинг 116 тонна ўсимлик ёғлари ва Украинанинг 60 тонна кунгабоқар ёғи биржа савдоларига қўйилмоқда.

Шакар

Биржанинг шакар бозорида ички талаб юқори даражада сақланмоқда. Хусусан, ҳафта давомида биржа савдоларига 8 110,0 тонна шакар қўйилди ва ушбу ҳажмнинг барчаси, яъни 100% сотилган.

Шу билан бирга, шакар бўйича ўтказилган биржа савдоларида ҳар куни ўртача 163 та харидор қатнашган ва бу аввалги ҳафтага нисбатан 27,3% га кўпдир.

Буларнинг натижасида кўриб чиқилаётган даврда шакарнинг барча категорияси бўйича шаклланган кунлик ўртача нархлар маҳсулотнинг бир тоннаси учун 7 463,7 минг сўмдан 7 691,0 минг сўмгача, яъни 3,0% га ўсган. Ўтказилган биржа савдолари натижасида маҳаллий шакарнинг 3-категорияси бўйича шаклланган ўртача ҳафталик нархи маҳсулотни бир тоннаси учун 7 604,3 минг сўмни ташкил этди.

Цемент

Ўтган ҳафта мобайнида биржа савдоларига 243 942,0 тонна цемент қўйилди ва улардан 224 783,0 тоннаси, яъни 92,1% сотилди. Ўртача кунлик сотув ҳажмлари 45,0 минг тоннани ташкил қилди.

Кўриб чиқилаётган даврда цементнинг барча категорияси бўйича шаклланган кунлик ўртача нархлар маҳсулотнинг бир тоннаси учун 579,1 минг сўмдан 572,0 минг сўмгача, яъни 1,3% га пасайди.

Бензин

Ўтган ҳафтада автомобиль бензинининг биржадаги нархи маҳсулотнинг бошланғич нархларини сотувчи корхоналар томонидан оширилиши ҳисобига ўсди. Биржа савдоларига 37 006,0 тонна АИ-80 маркали автомобиль бензини қўйилди ва улардан 11 394,2 тоннаси, яъни 30,8% сотилди. Ўтказилган савдоларда ҳар куни ўртача 26 харидор иштирок этди.

Кўриб чиқилаётган даврда сотувчи корхоналар АИ-80 маркали автомобиль бензинининг ўртача бошланғич нархларини маҳсулотнинг бир тоннаси учун 6 306,5 минг сўмдан 6 563,7 минг сўмгача ёки 4,1% га кўтаришди. Шу муносабат билан, АИ-80 маркали автомобиль бензиннинг ўртача кунлик нархи ҳам 6 306,7 минг сўмдан 6 564,7 минг сўмгача, яъни 4,1% га ўсди.

Кўриб чиқилаётган даврда АИ-80 русумли автомобиль бензиннинг ўртача ҳафталик котировкаси 6 446,3 минг сўмни, АИ-91 – 7 558,8 минг сўмни ташкил этди.

Эслатиб ўтамиз, турли манбаларда келтиришича автомобиль бензинининг бир тоннаси ўртача 1293-1370 литрни ташкил қилади.


Report Page