“UZAUTO MOTORS” - ХАЛҚАРО САНОАТ КЎРГАЗМАСИДА
2021 йилнинг 5-апрел куни Тошкент шаҳрида “INNOPROM: BIG INDUSTRIAL WEEK UZBEKISTAN” халқаро саноат кўргазмасига старт берилди.
Катта саноат ҳафталигининг биринчи кунида Россия давлатининг 260 дан ортиқ компаниялари, Хитой, Франция, Туркия, Германия, Япония ва Кореянинг ишлаб чиқариш корхоналари, шунингдек Европа Иттифоқи мамлакатлари иштирок этмоқда. Кўргазмада транспорт ва энергетика, IT технологиялар, тиббиёт технологиялари ва фармацевтика, хусусан мамлакатимизнинг 60 дан ортиқ тадбиркорлик субъектлари вакиллари ўзларининг саноат маҳсулотлари билан қатнашишмоқда. "Uzauto Motors" компанияси ички ва ташқи бозорларда сотиладиган автомобилларнинг барча турларини намойиш этди.
Россия делегациясига Россия федерациясининг Саноат ва савдо вазири Денис Мантуров раҳбарлик қилмоқда. Тадбир давомида Ўзбекистон Республикаси Бош вазирининг ўринбосари - инвестициялар ва ташқи савдо вазири С.У.Умурзаков ҳамда Россия Федерацияси Саноат ва савдо вазири Д.В.Мантуров иштирокида энг долзарб мавзулар бўйича ихтисослаштирилган сессиялар ўтказилди.
Халқаро саноат кўргазмасини ўтказишдан кўзланган мақсад, Марказий Осиё билан бизнес ҳамкорлик асосида фаолият юритиш ҳамда экспортни ривожлантириш ҳисобланади. Ўзбекистон республикаси саноат маҳсулотларининг, шу жумладан, автомобиллар, ускуналар ва бутловчи қисмлар, кимё ва фармацевтика маҳсулотлари, металл ва металл буюмлар, ёқилғи энергетика комплекси маҳсулотларининг муҳим импортчиси ҳисобланади. Ушбу йирик саноат кўргазмаси ҳафталиги эса Россия компаниялари ва бошқа халқаро компаниялар учун Ўзбекистон Республикаси бозорига кириш майдони бўлишга мўлжалланган.
Тадбир 5 – 7 апрел кунлари ўтказилиши мўлжалланган ҳамда унинг доирасида ўтказиладиган сессиялар, давра суҳбатлари, мастер-класслар ва презентацияларда халқаро ва минтақавий миқёсда ташқи иқтисодий фаолиятни амалга оширишда замон талабларидан келиб чиқиб ислоҳ қилиш, товар ва хизматларнинг минтақавий ҳамда халқаро экспортини қўллаб-қувватлаш масалалари муҳокама қилинади.
