УЕФА vs. Манчестер Сити (2)
Султанбейбарс2020 жылдың ақпанында «Манчестер Сити» УЕФА-ның клубтық жарыстарынан екі жылға шеттетілді және қаржылық fair play (FFP) ережелерін бұзғаны үшін 30 миллион еуро айыппұл салынды. УЕФА «Манчестер Сити» өзінің есеп теңгерімінде демеушілік кірістерін жалған түрде көтеріп, тергеуге қажетті ақпаратты бермеді деп мәлімдеді.
Алайда «Манчестер Сити» бұл шешімге бірден Спорттық төрелік сотқа (CAS) шағымданды. Олардың апелляциясы айыптаулардың жалған екендігіне және тергеумен толық ынтымақтастық көрсетілгеніне негізделді. Қаржылық fair play бұзушылықтарына қатысты істердің қандай алгоритммен іске асатыны туралы толығырақ мына мақалада оқи аласыз.
Енді Спорттық төрелік сотта орын алған істің шешуші мән-жайларына назар аударайық.
УЕФА аргументтері:
«Манчестер Сити» қаржылық fair play (FFP) ережелерін бұзып, өзінің есеп беруіндегі демеушілік кірістерін жоғарылатып көрсеткен.
«Манчестер Сити» істі тергеу барысында УЕФА-ға қажетті көмек көрсеткен жоқ.
«Манчестер Сити» өз әрекеттері арқылы трансферлік нарықта әділетсіз артықшылық алып, еуропалық клубтық жарыстардың тұтастығына нұқсан келтірді.
УЕФА клубтық жарыстарына қатысуға екі жылдық тыйым салу және 30 миллион еуро айыппұл Манчестер Ситидің үшін пропорционалды жазалау болды.
«Манчестер Сити» дәйектері:
УЕФА қолданған дәлелдер заңсыз жолмен алынғандықтан, олардың дауды шешу процессіне қолданылуына рұқсат етілмеуі қажет.
УЕФА «Манчестер Ситидің» сот ісін әділ түрде жүргізу құқығын бұзып, істі объективті қарастырмаған.
УЕФА келтірген ҚФП реттеулерінің бұзушылықтары бойынша талап қоюдың ескіру мерзімі өтіп кеткен.
Спорттық төрелік сотының (CAS) шешімі:
CAS-қа сәйкес электрондық поштадан ағып кеткен жеке хаттарды (УЕФА ісіндегі негізді дәлел) жоғары қоғамдық мүддеге байланысты жарамды дәлел деп тапты. Бұл тұжырымды заңсыз әрекетті (поштаны бұзу) жасаған тарап УЕФА болмағаны да қолдайды. Оған қоса, осы мәліметтердің көптеген белді бұқаралық ақпарат құралдарында басылуы қоғамдық мүдделердің «Ман Ситидің» мүддесінен басымырақ екенін көрсетеді.
CAS УЕФА тарапынан тиісті процестің бұзылуын, яғни УЕФА тарапынан құпиялылық пен бейтараптықты бұзу орын алғанын анықтаған жоқ.
Спорттық төрелік сот тараптардың ешқайсысы 5 жылдық ескіру мерзімі қашан басталатыны туралы дұрыс болмағаны екенін анықтады. Ескіру мерзімін бағалау негізінде CAS Etisalat арқылы болжамды жасырын қаржыландырудың ескіру мерзімі өтіп кетті деп шешті, бірақ 2013/14 және 2015/16 маусымдарында Etihad арқылы болжамды жасырын қаржыландыру жауапкершілікке тартылуы мүмкін болғандықтан, CAS оларды қарастырады деген шешімге келді.
«Ситиге» қарсы негізгі айып оның Etihad демеушілігі ретінде жасырын қаржыландыруға иеленгені туралы болды. CAS мәлімдемесіне сәйкес УЕФА бұндай әрекеттер шынымен орын алғанына жеткілікті дәлел келтірмеді деп шешті. Ағып кеткен хаттардан қандай да бір келісім жасалғаны (немесе жоспарланғаны) болуы мүмкін деп болжалса да, жасырын демеушілік жүзеге асырылғанынын нақты дәлелдейтін дәйек ретінде жеткіліксіз болды.
«Ситиге» қарсы екінші айып оның тергеу барысында УЕФА-ға қажетті ақпаратпен бөліспегені болды. CAS-қа сәйкес «Сити» екі жеке мәселе бойынша құжаттармен және өзге де мәліметпен бөліспей, тергеуге қажетті көмек көрсетпегенін анықтады. Палатаның УЕФА жарыстарынан екі жылдық шеттету және 30 миллион еуро айыппұл туралы алғашқы шешімі, ең алдымен тергеу барысында УЕФА-ға қажетті түрде көмек көрстепегендігіне емес, ішкі қаржыландыруды жасыруға негізделген деп мәлімдеді. Осыған байланысты CAS шеттетуді толығымен алып тастап, айыппұлды 10 миллионға дейін азайту туралы шешім қабылдады.
Қорытындылай келе, екі раундтық заң алаңындағы матчын «Сити» тарихындағы ең маңызды жеңісі деп айтсам қателеспеймін. Апелляцияда «қалалықтар» жеңіске жетпегенде клубтың бірталай көшбасшылары кетуі әбден ықтимал жағдай еді, аталған сценарий жайлы футболдың аңызына айналған команда бапкері Гвардиола да, команда аңызы Кевин де Брюйне де сұхбат берген.
CAS тағайындаған 10 миллион еуро сомасындағы айыппұл «Сити» сияқты қаржы гиганты үшін түкке тұрмайтын мизерлік жазалау десек те болады. CAS шешіміне қатысты қаншалықты күмәнмен қарасақ та, УЕФА «Ситидің» қаржылық fair play ережелерін бұзғаны туралы мәлімдемесін растайтын жеткілікті дәлелдер келтірмегені анық. Алайда бұл «Ситидің» ережелерді бұзбаған екенін білдірмейді.