Түнгі кремдер. Жалғасы

Кейде ойлауыңыз мүмкін, пəленшенің бетінде бір əжім жоқ. Олардың тұқымы сондай деп. Бұрын мен де солай ойлаушы едім. Бетіме үнемі күтім жасап жүрдім, əжім болған жоқ. Бірақ іштей ойлайтын едім, маған жаратқан басқа ештеңе бермесе де, жақсы тері берген шығар деп. Былтыр бір ауыр жағдайлар болды. Бетіме крем жақпақ түгіл, апталап айнаға қарамаған кез болған. Бетімді тоник не лосьон емес, көз жасым жуған деуге болар... Екі-үш айдан соң жұмысқа шығатын болдым. Айнаға қарасам маған жасы шамамен қырықтан асқан əйел қарайды (қазір жасым 36-да). Көз айналасын əжім торлаған. Осы күнге дейін тамаша ген арқасында емес, күтім нəтижесінде өңімнің сақталғанын сонда түсіндім. 

Сонымен түнгі кремдер.

Менің қолданатын косметика, кремдерімнің шамамен 60%-ын корей косметикасы құрайды. Ішіндегі ең жақсы көретін марка - Mizon. Əсіресе ұлу сериясы. Қазір қолымда жоқ. Бітіп қала береді 😜

Əжімге қарсы серияларының бірі Mizon Collagen power. Коллаген қуаты болатын шығар қазақша айтсақ. Крем құрамы теңіз коллагенінен тұрады дейді өндірушілер (54% коллаген екен). Консистенциясы қоюлау. Тіпті тонигінің өзі су емес, аздап гель қосылған сияқты қою. Күндіз емес, түнде жағатыным да сондықтан. Тониктен соң эмульсия, содан соң кремді жағамын. Көз айналасына арналған крем жеке. Тоник пен эмульсияның ыңғайлы дозаторы бар. Тағы бір ұнайтыны құтысы шыныдан жасалған. Органикалық ыдыста болуы мен үшін маңызды. Крем мен тоник, эмульсияның иісі жоқ. Бұл да плюс. Серия +25 жасқа арналған. Төртеуінің бағасы шамамен 20 мыңдай болып қалады. Айтпақшы корей косметикасын жеңілдікпен Алматыдағы бір бутиктен аламын. Қажет болса мекенжай, паролін айта аламын)). Бұл серияны үнемі пайдаланбаймын, бір- екі айдан соң басқамен алмастыру керек. Себебі коллаген үнемі келіп тұрса, өз теріңіз коллаген өндіруін тоқтатады. Айтпақшы бұл серия беттегі əжімдерді жазады, қоректендіреді. Бірақ жақсы ылғалдандырады демес едім. Қысқасы əжімдер жазылып, теріңіз тартыла түседі. Бірақ реңі өзгермейді (ағартпайды). Сондықтан да қыс мезгілінде қолданған дұрысырақ. Сосын Guerlain сияқты тез сіңіп кетпейді. Тіпті таңертең бетімді жуғанда майлы қабатын сеземін. Мұны минусы дер едім. Бірақ сіз Mizon-ның ұлу сериясын көрмедіңіз ғой)) Мен болдым. Бетімдегі кремім сіңген сияқты. Қайырлы түн 😊