Тошкентдаги 125 йиллик бинода ташкил этилган банк-музейни биласизми?
Ўзсаноатқурилишбанк Ахборот хизматиБугун, 18 май – Халқаро музейлар куни
Ўзсаноатқурилишбанкнинг Мирзо Улуғбек филиали нафақат молия муассасаси, балки банк-музей ҳам ҳисобланади. 2018 йилда банк раҳбариятининг ташаббуси билан бино тўлиқ реставрация қилиниб, 125 йил аввалги кўриниши деярли тикланган.
Пойтахтимиз маркази – Амир Темур хиёбонининг ёнида, Амир Темур музейи рўпарасида 1895 йилда қурилган Россия империяси Давлат банкининг собиқ Тошкент филиали биносида “Ўзсаноатқурилишбанк” АТБнинг Мирзо Улуғбек филиали фаолият кўрсатмоқда.
ХIХ аср охирида меъмор В.Гейнзелман лойиҳаси билан қурилган икки қаватли бино Амир Темур хиёбони ансамблининг бир қисми ҳисобланади. Мутахассисларнинг таъкидлашларича, банк биноси бизнинг кунларимизга деярли ўзгармаган шаклда етиб келган.
Банкнинг ташқи кўриниши ўша давр биноларига хос неоклассицизм услубида қурилган. Банкнинг ички кўриниши – Россия Империяси Давлат банки давридан буён сақланиб қолган қисмлар тўпламидан иборат бўлиб, ҳозирги вақтга келиб қайта тикланган. Сақланиб қолган полнинг қисмини такрорловчи плита нақшлари, гипсли шифтнинг плинтуси қайта тикланди.
“Ўзсаноатқурилишбанк”нинг Мирзо Улуғбек филиалига ташриф буюрган меҳмонлар ХIХ асрнинг асл меъморий элементларини: деворий печ ўтхонаси эшиклари, Франц Сан-Галли чўян қуйиш ва механика заводининг катта эшиклари, пул ва бошқа молларни кўтариш механизмларини кўришлари мумкин.
Амалиёт хонасида меҳмонлар Тошкент давлат банкининг биноси, Қўқондаги Москва ҳисоб палатаси, Самарқанддаги ғазна, Николаев, Романовский кўчалари, Кауфман катта кўчаси ва бошқаларнинг тарихий фотосуратлари билан танишишлари мумкин.
Музей экспозициясида телефон, ёзув машинкалари, давлат кредит карталари сингари бир қатор тарихий экспонатлар ҳам мавжуд.
Маълумот учун: «Ўзсаноатқурилишбанк» АТБ тарихига назар ташласак, молия муассасаси Ўзбекистондаги энг қадимги молия институтларидан бири ҳисобланади. Унинг тарихи 1922 йилда Тошкентда Саноатбанкнинг Ўрта Осиё бўлими очилишидан бошланади. Банкнинг мамлакатимизда 45 та филиали мавжуд.
