To‘rtko‘l tumani hokimi Rustam Azatovich Shamuratovning Ramazon hayiti munosabati bilan BAYRAM TABRIGI    

 Hurmatli yurtdoshlar!

Insoniylik, sabr-qanoat, shukronalik timsoli hisoblanmish bugungi qutlug‘ ayyom - Ramazon hayiti bilan barchangizni chin qalbimdan muborakbod etaman.

Barchamiz uchun qadrli bo‘lgan, azaldan mehr-oqibat, xayru saxovat va bag‘rikenglik ramzi sifatida e’zozlanib keladigan Ramazoni sharifni munosib o‘tkazish bo‘yicha joriy yilda tegishli chora-tadbirlar amalga oshirildi.

Bu esa mo‘min-musulmonlarimiz uchun farz hisoblangan diniy ibodatlarni fayzli va mazmunli o‘tkazib, ushbu muborak oyning fazilatlaridan to‘la bahramand bo‘lish imkonini bermoqda.

Bularning barchasi mamlakatimizda hukm surayotgan tinchlikning qadriga yetish, vijdon erkinligini ta’minlash, diniy-ma’naviy qadriyatlarni tiklash va e’zozlash yo‘lida olib borilayotgan sa’y-harakatlarning amaliy ifodasi bo‘lib hisoblanadi.

 Aziz vatandoshlar!

Ushbu shukuhli lahzalarda oila davrasida muborak Iyd-al-fitr ayyomini hursandchilik bilan kutib olayotgan yurtdoshlarimizni yana bir bor tabriklab, barchangizga sihat-salomatlik, baxt-saodat, xonadonlaringizga fayzu baraka tilayman.

Mo‘tabar mohi Ramazonda qilgan barcha ezgu duolaringiz ijobat bo‘lsin!

Ramazon hayiti barchamizga muborak bo‘lsin!