Таниқли режиссёр ва продюсер Джаник Файзиев "Ўзбеккино" билан ҳамкорлик қилади
"Ўзбеккино" Миллий агентлигида ташкилот раҳбарияти, режиссёр Рашид Маликов ва продюсер Ойбек Файзиев билан россиялик таниқли актёр, режиссёр ва продюсер Джаник Файзиев иштирокида онлайн учрашув бўлиб ўтди.
"Ўзбеккино" Миллий агентлиги раҳбари таниқли кино арбобини мамлакатимиз кино соҳасида амалга оширилаётган ислоҳотларнинг моҳияти билан таништирди. Томонлар бир қатор кино лойиҳаларини амалга ошириш бўйича қўшма ҳамкорлик режалари ва уларни амалга ошириш чора-тадбирларини муҳокама қилдилар.
Суҳбат аввалида Джаник Файзиев Ўзбекистонда юз бераётган ижобий ва кенг кўламли ўзгаришларни мамнуният билан қайд этди.
“Бир йилдан буён мен Ўзбекистонда содир бўлаётган ижтимоий-сиёсий воқеаларни диққат билан кузатмоқдаман ва бундан жуда илҳомландим. Назаримда ҳамма нарса рисоладагидек кетяпти. Машҳур ишбилармон бир танишим Ўзбекистон инвестициялар учун энг жозибали давлатлардан бирига айланмоқда, деган фикрни билдирди. Шуниси қувонарлики, кино саноати ҳам мунтазам ривожланиб бормоқда, бу хорижлик киноижодкорларни ҳам қизиқтириши табиийдир», - деди Джаник Файзиев.
Онлайн учрашув давомида ўзбек продюсери Ойбек Файзиев "Ўзбеккино"даги янги лойиҳа - ўзбек боксчиларининг Рио Олимпиадасидаги ғалабаларига бағишланган фильм ҳақида гапирди.
«Бу спортчиларимиз учун мислсиз ғалаба бўлди ва биз бундан бениҳоя фахрланишимиз керак. Ёшларимиз ҳақиқатан ҳам ҳаётларини яхши томонга ўзгартирадиган, уларга фидойилик ва қатъиятни ўргатадиган мотивацион фильмларга муҳтож. Ҳозирча “Енгилмас. Риога элтувчи йўл” номли спорт драмаси реал воқеаларга асосланган. Айни пайтда фильмнинг сценарийси ёзилмоқда. Ташаббусимизни Миллий олимпия қўмитаси, Жисмоний тарбия ва спорт вазирлиги ва Бокс федерацияси қўллаб-қувватламоқда. Жумладан, Федерация хорижлик актёрларининг фильмда иштирок этишини таъминлаш ниятида бўлиб, актёрларнинг гонорарларини тўлаш бўйича молиявий мажбуриятларни ҳам ўз зиммасига олди», - деди Ойбек Файзиев.
Джаник Файзиев ушбу лойиҳа шубҳасиз қизиқарли эканлигини, чунки Россияда спортчиларнинг ғалабалари ҳақидаги шу каби фильмлар мувафаққият қозонаётганини таъкидлади. Режиссёр лойиҳани амалга оширишда ўз ёрдамини беришга тайёрлигини билдирди.
Ўз навбатида, Агентлик раҳбари Джаник Файзиевга бугунги кунда "Ўзбеккино" томонидан олиб борилаётган учта йирик миллий кино лойиҳалари ҳақида гапириб берди. Булар Амир Темур, Имом ал-Бухорий ва Буюк Ипак йўли ҳақидаги фильмлар. Джаник Файзиев ушбу лойиҳаларда иштирок этишга ва ижодкорларни томонлама қўллаб-қувватлашга тайёрлигини билдирди. Шунингдек, режиссёр фильмларда иштирок этиш учун хорижлик актёрлар ва тажрибали кино мутахассисларини жалб қилишни тавсия этди.
Таъкидлаш жоизки, "Ўзбеккино" сўнгги йилларда мамлакатимиздан ўзига хос сабаблар билан чет мамлакатларга кетган ватандошларимизни - таниқли кино арбобларини ҳамкорлик ишларига жалб қилишга эришмоқда.
«Биз учун чет элда яшовчи киноижодкорларнинг миллий кино саноатимизни ривожлантиришга ҳиссасини қўшгани жуда муҳимдир. Масалан, узоқ йиллардан буён Италияда яшаб келаётган таниқли режиссёр Али Ҳамроев бу йил "Ўзбеккино"нинг таклифига биноан "Халқ жасорати" фильмини Ўзбекистонда ниҳоятда қисқа вақт ичида суратга олишга муваффақ бўлди. Ушбу фильм жорий йил 9 май - фашизм устидан қозонилган ғалабани нишонлаш куни муваффақиятли намойиш қилинди. Шунингдек, биз Юсуф Розиқов, Элёр Ишмуҳамедов, Одельша Агишев ва бошқа мутахассисларни ҳам кино лойиҳаларимизга жалб қилиш режалари устида ишлаяпмиз. Хориждаги юртдошларимиз билан жуда яқин, дўстона алоқалар ўрнатганмиз", - дея изоҳлади кинорежиссёр, "Ўзбеккино" Миллий агентлиги жамоатчилик кенгаши аъзоси Рашид Маликов.
Джаник Файзиев ўзбекистонлик машхур актер, режиссер ва продюсер. “Сиз кимсиз”, “Камми”, “Бешинчи бурчак”, “Турк гамбити”, “Август. Саккизинчи”, “Коловрат афсонаси”, “Галлактика дарвозабони” фильмларини суратга олган. Шунингдек, кўплаб фильмларда актёр ва продюсер сифатида иштирок этган.
