ТЕЗКОР: Фуқарони 50 минг АҚШ доллари эвазига АҚШга юборишни ваъда қилган таъмагир қўлга олинди

Фуқароларни чет элларга юбориш, мўмай даромад ваъда қилиб, катта миқдорда пул талаб қилиш эвазига кун кечираётган таъмагирларга ўлжа бўлиб қолаётган юртдошларимизнинг кўпчилиги ё пулидан ажралишяпти ёки бўлмаса одам савдоси қурбонига айланиб қолишмоқда.

Давлат хавфсизлик хизмати Самарқанд вилояти бошқармаси ҳамда вилоят ИИБ ходимлари ҳамкорлигида фирибгарларнинг қонунга хилоф ҳаракатларига чек қўйиш, ноқонуний миграциянинг олдини олиш борасида ўтказилаётган тезкор тадбирлардан бирида яна бир “уддабурон” “ҳожатбарор”нинг қилмишлари фош бўлди. Аниқланишича, фуқаро И.С маҳаллий фуқаро Ш.М.га ўзининг танишлари орқали АҚШ давлатига кириш визасини тайёрлаб беришини ва у ерда яхши иш ўринлари билан таъминлашини ваъда қилиб, бу “камтарона” хизмати эвазига 50.000 АҚШ доллари талаб қилган. 

Самарқанд шаҳрида ўтказилган тезкор тадбирда фуқаро И.С. олдиндан келишилган 45.600 АҚШ доллари миқдоридаги пулни фирибгарлик йўли билан олаётган вақтида ашёвий далиллар билан қўлга олинди.

Ҳозирда ҳолат юзасидан И.С.га нисбатан Ўзбекистон Республикаси ЖКнинг тегишли моддалари билан жиноят иши қўзғатилиб, тергов ҳаракатлари олиб борилмоқда.

Шунингдек, тергов жараёнларида И.С.нинг бошқа фуқаролардан ҳам фирибгарлик йўли билан олган маблағлари бўйича аниқлик киритилиб, ҳуқуқий баҳо берилиши таъминланади.

“Жиғилдон”ни ўйлаб, виждонни пуллаган бу каби кимсаларнинг бир кунмас, бир кун қонун олдида жавоб бериши тайин эди. Кўза кунда эмас, кунида синади, деганларидек, қинғир ниятли кимсаларнинг қилмишлари ҳам, албатта, қонуний жавобини олмай қолмайди.