ТЕМИР МАЙККА НИМА БЎЛДИ?

Афсонавий Майк Тайсоннинг соғлиғи борасида хавотир пайдо бўлди. Ўтган ҳафтада Майами аэропортида кўпчилик Майк Тайсонни ногиронлар аравачасида юрганини кўргач, ҳар турли узун-қулоқ гаплар тарқала бошлади. Устига-устак унинг қўлидаги ҳасса ҳам 56 ёшли боксчининг соғлиғи ёмонлашганлиги ҳақидаги тахминларни кучайтирди.

Темир Майкнинг аравачадан фойдалангани акс этган суратларга боксчининг ўзи подкаст орқали муносабат билдирди:

– Табиийки, ҳар биримиз бир кун келиб ўламиз. – Кўзгуга қараб бетимни кичик қора нуқталар қоплаганини кўрганимда, “ана холос, бу менинг яроқлилик муддатим тугашига яқин қолганини англатса керак”, деб ўйлаб қолдим.

Хўш, Майк Тайсонга ўзи нима бўлди? Боксчи қандай касалликдан азият чекадики, унинг ожиз ҳолатдаги суратлари дунё бўйлаб тарқалиб кетди.

АҚШ ОАВларининг ёзишича, афсонавий боксчига белининг пастки қисмидаги радикулит азоб бераётган бўлиб, шу муаммо туфайли у икки йил аввал тўшакдан туролмай қолган ва бир неча ҳафта дам олишга мажбур бўлган эди. Худди шу муаммо уни профессионал карьерасининг охирида чарм қўлқопларини илгакка осиб қўйишга мажбур қилди.

TMZ нашри хабарига кўра, “уни қуймуч нервидаги хуруж қийнамоқда. Жиддий нарса йўқ. Бу унинг ёшидаги боксчиларда учрайдиган касб касаллиги аломатидир”.

 Бироқ, Майк Тайсон барчанинг диққат марказидаги спортчи эмасми, тарқалган суратлар кўпчиликнинг эътиборини тортди. Чунки бир неча ҳафта аввал Темир Майк ўзининг янги жанги олдидан ўтказган қизғин ва шиддатли машғулотларидан суратларни баҳам кўрган эди.

Гап шундаки, Youtubeдаги блогерлардан бири Жейк Пол уни рингга чақирган ва кўпчилик бу жангнинг қизиқарли бўлишига умид билдираётган эди. Тайсоннинг ўзи июнь ойидаги интервьюсида бу жанг шу йил охиригача ўтказилишига умид қилаётганини айтган эди. 

Эндиликда Темир Майк иштирокидаги бу жанг бўлиб ўтадими ёки йўқ, буни билиш учун боксчининг соғлиғи билан боғлиқ вазиятнинг яхшиланишини кутишимизга тўғри келади.

https://www.marca.com сайти хабарини Мавлон Бобохонов ўгирди.

https://www.marca.com/en/boxing/2022/08/22/6302bee346163ff4228b4585.html