Суғурта фаолияти классификатори кенгайтирилди

Ўзбекистон Республикаси Президентининг “Суғурта бозорини рақамлаштириш ва ҳаёт суғуртаси соҳасини ривожлантириш бўйича қўшимча чора-тадбирлар тўғрисида”ги қарорига асосан суғурта фаолияти классификаторини кенгайтириш ҳамда шу орқали ҳаёт суғурта соҳаси ва шахсий суғурта бозорида суғурта хизматлари турларини оммалаштириш, аҳоли ва иқтисодиётнинг эҳтиёжларига хизмат қиладиган суғурта маҳсулотларини ишлаб чиқиш белгиланган.

Шу мақсадда, (09.06.2022й.) Вазирлар Маҳкамасининг “Ўзбекистон Республикаси Ҳукуматининг айрим қарорларига ўзгартиришлар киритиш, шунингдек, баъзиларини ўз кучини йўқотган деб ҳисоблаш тўғрисида”ги (№323) қарори қабул қилинган.

Қарорга мувофиқ, Вазирлар Маҳкамасининг “Махсус электрон тизим орқали айрим фаолият турларини лицензиялаш тартиби тўғрисида”ги ягона низомнинг 6-иловасидаги “Суғурта фаолияти классификатори”га қўшимча суғурта классларини қўшиш орқали кенгайтирилди.

Бунда, ҳаётни суғурта қилиш соҳасидаги мавжуд 4 та классга яна 3 та класс қўшилди. Жумладан:

Тартиб рақами бўйича V-класс, яъни “Мажбуриятларни таъминлаш учун ҳаётни суғурталаш”. Бунда, Суғурталанган шахс қарз муддати тугагунига қадар омон қолиш ёки бошқа мажбуриятни тўлиқ бажаришдан олдин вафот этган тақдирда, суғурталанган шахснинг наф олувчилари ва (ёки) суғурталанган шахснинг мажбуриятлари бўлган бошқа шахсга ушбу мажбурият доирасида суғурта мукофотлари қайтарилмаган ҳолда, суғурта суммаси тўлаб берилади.

Тартиб рақами бўйича VI-класс, яъни “Узоқ муддатли ихтиёрий пенсия суғуртаси”. Бунда, Суғурталанган шахс пенсия ёшига етганида суғурта шартномасида белгиланган ойлик рента ёки бир марталик тўлов шаклидаги суғурта суммалари суғурталанган шахсга тўлаб берилади.

Тартиб рақами бўйича VII-класс, яъни “Капитални қайтариш билан ҳаётни суғурталаш”. Бунда, Суғурта қилдирувчи қўйилган маблағларнинг қайтмаслик хавфида иштирок этиш шарти билан, тўланган суғурта мукофотлари ва суғурта тўловининг кафолатланган суммаси ва суғурта шартномасида белгиланган тўлов муддати доирасида инвестиция объектини аниқлаш ва жойлаштириш масаласини ҳал қилишда иштирок этиш билан ҳаётни суғурталаш турлари мажмуи тушунилади.

Шунингдек, умумий суғурта соҳасидаги мавжуд 17 та суғурта класслари қаторига яна 1 та суғурта класси қўшилди. Жумладан:

Тартиб рақами бўйича 18-класс – яъни “Тиббий суғурта”. Бунда, Суғурталанган шахснинг суғурта шартномасида кўрсатилган шартларга мувофиқ, тиббий ёрдам олишини таъминлайдиган суғурта турларининг мажмуи ҳисобланади.

Суғурта қилдирувчилар, яъни барча фуқароларимиз суғурта соҳасига киритилган ушбу янги суғурта классларидан фойдаланиш учун мазкур суғурта класслари бўйича фаолият олиб бориш ҳуқуқини берувчи лицензияга эга бўлган суғурта ташкилотларига мурожаат қилишлари мумкин бўлади.

Ўз навбатида, мамлакатимизда фаолият олиб бораётган суғурта ташкилотлари янги қўшилган суғурта класслари бўйича фаолият олиб боришлари учун қонунчиликда ўрнатилган тартибда ўзларининг лицензияларини қайта расмийлаштиришлари учун “Лицензия” ахборот тизими орқали ариза юборишлари мумкин.

Суғурта классификаторига киритилган мазкур суғурта класслари мамлакатимиз суғурта бозоридаги хизматлар турини кенгайишига, суғурта ташкилотлари томонидан кенг қамровли суғурта хизматларини кўрсатиш орқали аҳоли турмуш даражасини оширишга хизмат қилади ва иқтисодиётга қўшимча инвестиция маблағларини жалб қилиш имкониятини беради.