Статистика: Қозоғистон Ўзбекистондан энг кўп енгил автомобил сотиб олмоқда

2021 йилнинг беш ойида Қозоғистон Ўзбекистондан энг кўп енгил автомобил сотиб олган. Ўтган йилнинг биринчи чораги ва йил якуни бўйича ҳам Қозоғистон Ўзбекистондан енгил автомобил импорт қилиш бўйича етакчи бўлган. 

Давлат статистика қўмитасининг хабар беришича, 2021 йилнинг январь-май ойларида хорижий давлатларга 134,9 млн доллар қийматига тенг енгил автомобил экспорт қилинган. Енгил автомобил экспорти ўтган йилнинг мос даврига нисбатан қарийб 85 млн АҚШ долларига ошган.

Жорий йилнинг беш ойида Ўзбекистон енгил автомобил экспорт қилган асосий давлатлар қаторида Қозоғистон етакчи бўлган (127,1 млн доллар).

Бундан ташқари, Ўзбекистондан Афғонистон (2,7 млн), Украина (2,3 млн), Қирғизистон (1,0 млн), Россия (955,9 минг), Озарбойжон ( 444,7 минг), Тожикистон (339,1 минг АҚШ доллари) енгил автомобил сотиб олган.

Ўтган йил якунига кўра, Ўзбекистон енгил автомобилларни, асосан, Қозоғистонга (13 812 дона) экспорт қилганди. Қозоғистон ўтган йил мобайнида қиймати 131,9 млн AҚШ долларига тенг 13 812 дона автомобил сотиб олган. Бу Ўзбекистон хорижга экспорт қилган автомобилларнинг 83 фоизи дегани.

Шунингдек, 2020 йилнинг биринчи чорагида енгил автомобиллар экспортидан тушган маблағнинг 94 фоизи Қозоғистон ҳиссасига тўғри келган.