Соғлиқни сақлаш вазирлиги:

ОИЛА БЕКАСИ ВАФОТ ЭТДИ, ОТА ВА КАТТА ЎҒИЛ - КОМАДА, ҚОЛГАНЛАРНИНГ АҲВОЛИ - ҚОНИҚАРЛИ

Аввал хабар берганимиздек, Чироқчи тумани “Лангар” МФЙ Тутли қишлоғилик оиланинг етти нафар аъзоси уй шароитида тайёрланган помидор консервасидан заҳарланиб, вилоят марказидаги шифохоналарга ётқизилган эди.

Кўрсатилган тиббий ёрдамга қарамасдан шу йилнинг 18 ноябрь куни соат тахминан 08.00 атрофида мазкур оила бошлиғининг турмуш ўртоғи  Ю.У. вафот этди.

Эслатиб ўтамиз, Республика шошилинч тиббий ёрдам илмий маркази вилоят филиалига келтирилган оила бошлиғи, унинг турмуш ўртоғи ва катта ўғлига “Ботулизм касаллигининг оғир даражаси. Ўткир токсемия даври. Токсик нейропатия. Ўткир нафас етишмовчилиги I даражаси” ташхиси қўйилган эди. Кўрсатилаётган малакали тиббий хизматга қарамасдан айни пайтда ота ва катта ўғилнинг аҳволи ҳам ўта оғирлигича қолмоқда. Улар сунъий нафас олдириш аппаратида сақланмоқда.

Ижтимоий тармоқларда тарқалган, оиланинг барча аъзолари комада эканлиги ҳақидаги хабарлар эса асоссиз. Шифокорлар беморлар ҳаёти учун курашмоқда. Айни пайтда оиланинг қолган тўрт нафар аъзоси вилоят юқумли касалликлар шифохонасида даволанмоқда. Уларнинг аҳволи қониқарли.

Соғлиқни сақлаш вазирлиги

Жамоатчилик билан алоқалар бўлими.