Сайловни тўхтатиш керак деган фикрларга қарши бизнинг муносабатимиз. Сайлов ўзи нима учун керак?
1️⃣ Биринчидан, сайлов бу жамият кўзгуси! Сайлов жараёнида жамият ўзини кўзгуда бир кўриб сарҳисоб қилиб олади, нима яхши ишлар қилиндию, яна қандай ишлар қилиш керак. Гап шундаки инсоният кундалик ҳаётида кўп нарсага эътибор бермайди, ўзи билан ўзи овора бўлади, аммо сайлов бошланиши билан ҳар бир инсон ён атрофига қарай бошлайди, қайси номзод нима таклиф қилаяпти, солиштиради, ўзининг дардини ифода қила бошлайди, демак, сайлов кўзгу сифатида халқнинг дардини акс эттиради ва буни ҳар бир Президентликка номзод ўз сайлов олди дастурида ифода қилади ҳамда унинг ечимини таклиф қилади.
2️⃣ Иккинчидан, сайлов бу сиёсий кучлар рақобати! Фалсафада буюк немис олими Гегель кашф қилган 3 та қонундан бири-Қарама қаршиликлар бирлиги ва кураши қонунига биноан, ҳар қандай ҳаракат ва ривожланиш манбаини зиддиятлар ташкил этади, бу ҳоҳ табиатда бўлсин, ҳоҳ жамиятда, ҳоҳ инсон тафаккурида бўлса ҳам. Бу қонунни ривожланиш манбаи сифатида сиёсатга тадбиқ этадиган бўлсак, бу сайлов ва ундаги номзодлар рақобати шаклида намоён бўлади. Рақобатчилар бир бирининг устидан ғалаба қозониш учун, ҳар бири сайловчиларга жамиятнинг энг долзарб бўлган масалаларини аниқлайди ва унинг ҳал қилиниш йўлларини таклиф қилади.Бунинг натижасида бутун жамият қўзғалади, жамиятнинг сиёсий онги, сиёсий маданияти кўтарилади, бунга охирги йиллардаги очиқлик, сўз эркинлиги, сиёсий плюрализм шароити анча имконият яратмоқда.
3️⃣ Учинчидан, сайлов бу катта имконият! Бизнинг Конституциямизнинг МУҚАДДИМАсида демократия ва ижтимоий адолатга садоқатини намоён қилиб, халқаро ҳуқуқнинг умум эътироф этилган қоидалари устунлигини тан олган ҳолда, республика фуқароларининг муносиб ҳаёт кечиришларини таъминлашга интилиб, инсонпарвар демократик ҳуқуқий давлат барпо этиш белгиланган. Биз демократик ҳуқуқий давлатда яшар эканмиз, ушбу Асосий қонуннинг 32-моддасида “Ўзбекистон Республикасининг фуқаролари жамият ва давлат ишларини бошқаришда бевосита ҳамда ўз вакиллари орқали иштирок этиш ҳуқуқига эгадирлар”, деб кўрсатилган ҳуқуқимиздан фойдаланиш имкониятини қўлдан бой бермаслигимиз ўта муҳим.
☝️Энг муҳими ушбу сайловда танлаш имконияти мавжуд, ундан ҳар бир сайловчи - фуқаро жамият ривожи учун тўғри фойдаланиши зарур. Демак, сайлов ушбу имкониятдан фойдаланиш учун керак! “Яхши ният-ярти мол!”, дейди халқимиз.
✍️ Исмоил Саифназаров,
фалсафа фанлари доктори, профессор.
Оддий сайловчи
(https://t.me/joinchat/juwf9UQHz5A3ZWFi)Каналга уланиш: