ССВ: Италиялик травматолог ўзбекистонлик ҳамкасблари билан ноёб операциялар ўтказди
![](/file/9e35a94ec442e89407166.png)
Яқин-яқингача тиббиёт ожизлик қилган қатор касалликларга эндиликда даво чоралари топилмоқда. Ҳаммаси — инновацион ёндашув натижаси.
Аммо кечагина дунёнинг бошқа нуқтасида қўлланилган илғор амалиётни қандай қилиб қисқа муддатда юртимизда татбиқ этиш мумкин? Бу ўринда хорижий ҳамкорлик масаласи ўта муҳим.
Италиянинг Равенна шаҳридаги “Santa Maria delle Croci” госпитали раҳбари, Эмилия-Романья ҳудуди бош травматологи Альберто Беллуатини шу мақсадда мамлакатимизга таклиф этилди.
![](/file/61714d8722e741fc77a5e.png)
Муҳими, таниқли шифокорнинг ташрифи кутилганидек самарали бўлди. У Ўзбекистонга сафари давомида Республика ихтисослаштирилган травматология ва ортопедия илмий-амалий тиббиёт марказида бўлиб, тўрт нафар беморда юқори технологик мураккаб операциялар ўтказди.
Аслида чаноқ-сон бўғимларини эндопротезлаш амалиёти муассаса мутахассислари учун янгилик эмас. Бу борада шифокорларимиз катта тажриба ва салоҳият тўплаган. Аммо бу галги беморларнинг ҳолати анча мураккаб эди.
Масалан, улардан бирига “икки томонлама коксартроз, коронавирусдан сўнгги синдром, иккала сон суяклари бошчаларининг асептик некрози” ташхиси қўйилган эди.
![](/file/780b56c3bd2e43bae2fd6.png)
Италиялик шифокор ўзбекистонлик ҳамкасблари иштирокида бу дардни даволаш учун ноёб амалиёт ўтказишга қарор қилди. Натижада бир вақтнинг ўзида беморнинг иккала чаноқ-сон бўғимига замонавий эндопротез мосламалари ўрнатилди. Икки соат давом этган операция муваффақиятли ўтди.
Бундан ташқари, Альберто Беллуатини томонидан 20 нафардан ортиқ беморлар консультация қилинди. Марказнинг реабилитация, артроскопия, спорт травматологияси, жароҳатлар оқибати ҳамда катталар травматологияси бўлимларида тиббий кўриклари ташкил қилинди.
![](/file/1cd25836e7fd52363dcf9.png)
Яна бир эътиборли жиҳати, Республика ихтисослаштирилган травматология ва ортопедия илмий-амалий тиббиёт марказининг “Santa Maria delle Croci” госпитали билан ҳамкорлик алоқаларини йўлга қўйиш юзасидан музокаралар олиб борилди.
Соғлиқни сақлаш вазирлиги
Матбуот хизмати.