ССВ: Бешинчи қаватдан йиқилган беморда жарроҳлик амалиёти муваффақиятли ўтказилди

Республика шошилинч тиббий ёрдам илмий марказида яна бир мураккаб жарроҳлик амалиёти муваффақиятли ўтказилди. Шу йилнинг 23 февраль куни 2004 йилда туғилган бемор А. оғир ҳолатда тез тиббий ёрдам машинасида РШТЁИМ қабулхонасига олиб келинган.

Бемор қурилиш объектининг 5-қаватидан йиқилиб тушгани сабабли жароҳат олгани аниқланган. У зудлик билан шок залига ётқизилиб, марказ мутахассислари томонидан бош мия, бўйин, кўкрак ва бел умуртқа поғонаси, кўкрак қафаси, қорин бўшлиғи аъзоларида МСКТ текшируви ҳамда қорин бўшлиғи,  кўкрак қафасида ультратовуш текширувлари ўтказилиб, беморга ташхис қўйилган.

—             Тегишли мутахассислар текширувидан сўнг қўйилган ташхис асосида беморда зудлик билан бир неча жарроҳлик амалиётлари ўтказилди, — дейди марказ директори Дониёр Алимов. — Декомпрессив ляминэктомия, айрим умуртқаларни реклинация ва стабилизация қилиш орқали умуртқа поғонасига транспедикуляр система ўрнатиш каби операциялар шулар жумласидан. Юқори савияда ўтган амалиётлар натижасида беморнинг ҳаёти сақлаб қолинди.

Операциядан кейин кўкрак ва бел соҳаси МСКТ қилинганда, ҳеч қандай хафв аниқланмаган. Ўтказилган жаррохлик амалётлари ва даво чоралари натижасида ўсмир йигитчанинг умумий аҳволи яхшиланди. Ҳозирда унинг гемодинамик  кўрсаткичлари барқарорлашиб, кундан кунга ижобий ўзгаришлар қайд этилмоқда.

Соғлиқни сақлаш вазирлиги

Матбуот хизмати.

▶️@ssvuz

▶️@ssvmatbuotkotibi