Расмий муносабат. Бекобод туманида ИИО ходимлари билан боғлиқ ҳолат юзасидан
Toshkent viloyati IIBB
Кеча, 16 апрель куни Тошкент вилояти ҳокими Даврон Ҳидоятов Бекобод тумани Мусиқа ва санъат мактабида ёшлар билан учрашув ўтказган.
Учрашув бошлангандан кейин келган “Ўзбекистон” МФЙда яшовчи 1990 йилда туғилган фуқаро С.А.га ҳокимлик масъуллари томонидан мавжуд эпидемиологик вазият ва бинодаги фуқаролар сиғимидан келиб чиқиб, мурожаатлари тингланган ёшлар чиққандан сўнг қабулга кириши мумкинлиги бир неча бор тушунтирилган. Аммо, фуқаро С.А. ҳокимлик ходимлари билан жанжал қилиб, уларни турли сўзлар билан ҳақоратлаган.
Шу вақтда ҳодиса жойида бўлган Бекобод тумани ИИБ профилактика инспектори томонидан фуқаро С.А. жамоат жойида юриш туриш қоидаларига риоя этиш ҳақидаги огоҳлантиришга қарамай, ўз хатти-ҳаракатини давом эттирган ва ИИО ходимининг қонуний талабини бажармаган.
Жараённи сўз эркинлигини чеклаш билан боғлаётган айрим ижтимоий тармоқ фойдаланувчилари учун, бу ҳолатда фуқаронинг сўз эркинлигига чеклов ёки қаршилик кўрсатилмаган. Ундан жамоат тартиби ва юриш туриш қоидаларини бузмаслиги сўралган.
Ҳаракат давом эттирилгач фуқаро С.А туман ИИБга олиб борилган. Ҳозирда ҳолат юзасидан терговга қадар текширув ҳаракатларига ўтказилмоқда.
ИИББ Ахборот хизмати