Расмий муносабат

2020 йилнинг 21 октябрь куни соат 0700 ларда компания ишчилари Қашқадарё вилояти, Нишон тумани, “Гулистон” МФЙ ҳудудида жойлашган “UZBEKISTAN GTL” заводининг ошхонасига кириш жараёнида ўрнатилган тартиб қоидалардан норози бўлишиб, безорилик йўли билан корхонанинг жуда кўп миқдордаги мулкига шикаст етказиш мақсадида, завод қурилишига жалб қилинган ходимларнинг хизмат хоналарига оммавий тартибда, жамиятда ўрнатилган ахлоқ-одоб қоидаларини қасддан менсимасдан, безорилик йўли билан кириб, компания ходимларининг хизмат хоналарига кириш эшиклари ва дераза ромларининг ойналарини қўллардаги тош ва темир жисмлар билан қасддан уриб синдириб, яроқсиз холатга келтирган ҳолда ходимларнинг хизмат хоналарига кириб, хизмат хоналарида ўрнатилган 19 турдаги 14 млн 320 минг сўмлик кузатув камералари, 9 дона ҳар хил турдаги жами 4 млн 365 минг сўмлик ёзув столлари, 33 дона жами 27 млн 777 минг сўмлик “кондиционер” ларга хамда корхоналарнинг ҳаммаси бўлиб 480 млн сўмлик жуда кўп миқдордаги мол-мулкларини яроқсиз ҳолатга келтириб, қасддан шикаст етказишган.
Мазкур ҳолат юзасидан ҳодиса содир бўлган жой Қашқадарё вилоят ИИБ ҳузуридаги Тергов бошқармаси терговчилари томонидан кўздан кечирилиб, корхонага етказилган зарар миқдори аниқланиб, 2020 йилнинг 26 октябрь куни холат юзасидан Ўзбекистон Республикаси ЖКнинг 173-моддаси 2-қисми “в” банди ва 277-моддасининг 2-қисми “б,в,е” бандлари билан жиноят иши қўзғатилган.
Корхонанинг видеокузатув камераларидаги видеолар кўздан кечирилиб, ишга алоқадор бўлган ишчилар жиноят иши доирасида гувоҳ тариқасида сўроқ қилинган.
Бироқ, 2020 йилнинг 29 октябрь куни жиноят иши бўйича гувоҳ тариқасида сўроқ қилиш учун чақирилган шахслар ўзлари билан шахсни тасдиқловчи ҳужжатларини олиб келишмаганлиги, хаттоки “UZBEKISTAN GTL” заводи худудига кириш учун берилган ҳужжат (рухсатнома) ларини хам олиб келишмаганлиги сабабли, дастлаб уларнинг шахсига аниқлик киритилиб, шахслариига аниқлик киритилганидан сўнг вилоят ИИБ маъмурий биносига, яъни вилоят ИИБ ҳузуридаги Тергов бошқармасига киритилган.
Ижтимоий тармоқларда тарқалган расмда хам ишчилар вилоят ИИБ маъмурий биносига кириш жойида кутиб туришганлиги акс этган.
Терговга чақирилган фуқаролар вилоят ИИБ ҳузуридаги Тергов бошқармасига келиб кутиб туришларини олдини олиш ва жиноят иши бўйича кўплаб тергов ҳаракатлари ўтказиш зарурати юзага келганлиги сабабли жиноят иши юзасидан тергов гуруҳи тузилганлиги сабабли Терговга келган фуқароларнинг кутиб туришларига зарурат йўқ.
Қашқадарё вилоят ИИБ Ахборот хизмати.