РШТЁИМ Бухоро филиалида 2 та беморда навбатдаги ҳаётбахш буйрак трансплантацияси операцияси мувоффақиятли бажарилди

Бугун замон ўзгармоқда, одамларнинг талаби ошиб бормоқда. Халқимизнинг тиббий маданияти юксалиб, энг сўнгги усул ва русумларда тиббий хизмат кўрсатилишини исташмоқда. Бизга шу ҳам бўлаверади, деган тушунча энди ўз умрини ўтаб бўлди. Бу барча соҳалар қатори тиббиёт соҳасига ҳам бевосита дахлдор. Шу боис соҳа ходимлари тиббиётнинг энг илғор, замонавий ютуқларини, даволаш усулларини ўзлаштирмоғи зарур. Эришилган ютуқларга маҳлиё бўлиб ўтириш тараққиёт йўлидаги энг катта ғовдир” деган эди муҳтарам президентимиз. Ҳурматли Президентимизнинг ПҚ-5254-сонли қарори ижросини бажариш йўлида Республика бўйича мамлакатимизнинг етук билим-тажриба ва малакага эга бўлган мутахассислари томонидан трансплантация амалиётлари мувоффақиятли амалга оширилмоқда.

Республика шошилинч тиббий ёрдам илмий маркази Бухоро филиалида куни кеча навбатдаги ҳаётбахш жарроҳлик амалиётлари ўтказилди. Бир неча йилдан буён буйрак етишмовчилиги ташҳиси билан азият чекиб, гемодиализ сеанслари ёрдамида даволаниб келишга мажбур бўлган Бухоролик 2 нафар беморда буйрак кўчириб ўтказиш юқори технологик мураккаб жарроҳлик операцияси амалга оширилди.

Тошкентлик бир гуруҳ трансплантолог мутахассислар томонидан РШТЁИМ Бухоро филиали мутахассислари иштирокида буйракни кўчириб ўтказиш амалиёти 6 соат давомида муваффақиятли ўтиб, кўчирилган буйрак ўз фаолиятини бошлади. Операция амалиёти бажарилганлардан бири Бухоро туманида истиқомат қилувчи 26 ёшли бемор ҳисобланади. Унга 46 ёшли онаси донор бўлди. Реципиент ва донорнинг аҳволи қониқарли, тиббий меъёрий талабларга мос. Икккинчи бемор 1996 йилда туғилган Қоракўл туманида яшовчи бемор бўлиб, унга ҳам 1977 йилда туғилган онаси донорлик қилди. Уларнинг соғлигида ижобий ўзгаришлар кузатилмоқда. Беморнинг оила аъзолари ва яқинлари қувончи чексиз.

Ҳукуматимиз томонидан олиб борилаётган оқилона сиёсат, Соғлиқни сақлаш тизимини ислоҳ қилиш самараси ўлароқ ҳозирги кунда оғир дардга чалинган, доимий даволаниш курсларини олиб юришга мансуб гуруҳлар қаторига кирувчи беморлар, ватандошларимиз ўз она юртида шифо топиш бахтига эришмоқдалар.        

РШТЁИМ Бухоро филиали Ахборот хизмати.